Dünyanın ən çox "yatan" ölkələri açıqlandı

Hər il mart ayının 3-cü cüməsi Ümumdünya Yuxu Gününün gəlməsi ilə insan orqanizminin həm ruhi, həm də fiziki sağlamlığının mühüm bir hissəsi olan yuxu ilə bağlı təkliflər və müzakirələr yenidən gündəmə gəlir.

Sonxeber.az xarici mətbuata istinadən xəbər verir ki, Ümumdünya İqtisadi Forumunun (WEF) araşdırmasında, əhalisi ən çox yatan ölkələrin xəritəsinə əsasən, insan orqanizminin tələb etdiyi orta yuxu müddəti 8 saat olaraq ifadə edilir.

"Online Newsletter" və "PR Service B2Press" tərəfindən təhlil edilən məlumatlara görə, Yeni Zelandiya, Finlandiya, Hollandiya, Avstraliya və Böyük Britaniya 7 saatdan çox yuxu müddəti ilə dünyada ilk beşliyə daxildir. Onları Belçika, İrlandiya və Fransa izləyir.

Həyat tərzi, ətraf mühit şəraiti və psixoloji proseslərin yuxu rejiminə birbaşa təsir etdiyinə diqqət çəkərək, "COVID-19" epidemiyasının dünyada bir çox insanın yuxu probleminə səbəb olduğu vurğulanıb. Hər 4 nəfərdən birinin yuxu problemi yaşadığı bildirilir.

Eyni zamanda, qadınların yuxusuzluq riskinin kişilərə nisbətən 40 faiz yüksək olduğu vurğulansa da, yuxusuzluqdan əziyyət çəkən ölkələrin başında Cənubi Koreya və Səudiyyə Ərəbistanı durur.

Aygün Osmanlı

Telegramda izləyin