"Birinci Qarabağ müharibəsində Fərrux zirvəsi uğrunda gedən qanlı döyüşlərdə xeyli şəhid vermişik"

"Ali Baş Komandan İlham Əliyevin rəhbərliyi ilə müzəffər ordumuz 44 günlük Vətən müharibəsində ərazi bütövlüyümüzü bərpa etməklə düşmənə tarixi dərs verdi".

Bunu Sonxeber.az-a danışan deputat Cavanşir Paşazadə deyib.

Deputat vurğulayıb ki, Ali Baş Komandanımızın diplomatik gücü, qəbul etdiyi qərarlar və canları bahasına ərazi bütövlüyümüzü bərpa edən mərd oğullarımız sayəsində 44 günlük Vətən müharibəsində torpaqlarımız erməni işğalından azad olundu və Azərbaycan bütün dünyada qalib ölkə kimi tanındı:

"44 günlük Vətən müharibəsindən sonra növbəti Fərrux zəfəri post-münaqişə dövründə Azərbaycanın bölgədə sülhyaratma missiyasının vacib və uğurlu mərhələrindən biridir. Ən önəmlisi isə Azərbaycan Silahlı Qüvvələrinin Fərrux kəndini nəzarətə götürməsi növbəti zəfərimiz olmaqla yanaşı, həm də Ali Baş Komandan İlham Əliyevin nə vaxt, nəyi, necə etmək lazım olduğunu yaxşı bildiyini növbəti dəfə sübut etdi. Heç kəsə sirr deyil ki, Birinci Qarabağ müharibəsində Fərrux zirvəsi uğrunda gedən qanlı döyüşlərdə xeyli şəhid vermişik. Fərrux zirvəsinin azad edilməsi həm də o şəhidlərin ruhunu şad etdi.

Ən önəmlisi isə bu zirvənin azad edilməsi Ağdamın təhlükəsizliyinin tam təmin edilməsi deməkdir. Fərrux zirvəsinin Azərbaycan ordusunun nəzarətinə keçməsi digər kəndlərimiz və zirvələrimizin də tezliklə tam bizim nəzarətimizə keçəcəyi ehtimalını artırır".

Deputat qeyd edib ki, əslində Fərrux kəndinin, Daşbaşı dağının və digər strateji yüksəkliklərin işğaldan azad olunmasını cənab Prezidentin səbir və təmkinlə apardığı hərbi-siyasi diplomatiyanın növbəti qələbəsi kimi də dəyərləndirmək olar:

"Artıq cənab Prezident İlham Əliyevin "Mən nəyi, necə və nə vaxt etməyi yaxşı bilirəm" sözləri zaman-zaman öz təsdiqini tapmaqdadır. Bu möhtəşəm qələbə sevincini bizə yaşadan Ali Baş Komandana və Müzəffər Azərbaycan Ordusuna təşəkkür edirəm".

Aysel Yusifqızı

Telegramda izləyin