"Miasteniya" barədə bilmədikləriniz - CƏRRAH AÇIQLADI - ÖZƏL

Bir çoxlarının məlumatsız olduğu "Miasteniya Gravis" xəstəliyindən müalicə alan insan sayı, təəssüf ki, Azərbaycanda da az deyil. Lakin insanlar bu xəstəlik haqqında eşitmədikləri üçün artıq miasteniyanın ağırlaşmış formasında Həkimə müraciət edirlər.

Bəs bu xəstəliyin simptomları nədir? Onun barəsində nələri bilməliyik?

Sonxeber.az olaraq, mövzuyla bağlı suallarımızı ATU-nun Tədris Cərrahiyyə Klinikasının torokal cərrahı Arif Ağayev-ə yönləndirdik.

Onun sözlərinə görə, xəstəliyin əsas əlaməti yorulmaqla artan və dincəlməklə qismən düzələn əzələ gücsüzlüyüdür:

"Diaqnostika zamanı xəstədə birinci əzələ zəifliyi hiss olunur. Əlamətlər danışma, udma, çeynəmədə çətinlik, xəstəliyin ən ağır halında da tənəffüsün çətinləşməsidir. Miasteniya, formalarından asılı olaraq, lokal və ya "generalizə" simptomlarla başlaya bilər. Lokalla başlayarsa, udqunma pozulması, göz qapaqlarının düşməsi halları baş verir, xəstələrdə darıxma hissi olur, sanki nəfəs almaq istəyib, tam ala bilmirlər. Günün sonuna yaxın aşağı ətraflarda yorğunluq, tükənmə hissi olur. Ən klassik simptom borner, yəni göz qapaqlarının düşməsi halıdır. Adətən bu, sağ göz qapağında olur, udqunma pisləşdiyi üçün ağızdan selik axması halı baş verir. Bu xəstələrə kəskin diaqnozlar qoyula bilər. Ən başından nevroloqlara müraciət etsələr, nevroloji halı dəyərləndirilsə, müalicə uğurlu olar. Terapevt və digər həkimlərə getsələr, düzgün olmayan uzun prosesdən keçəcəklər".

Həkim-cərrah söyləyib ki, göz qapağının düşməsi klassik simptomdur:

"Bu o deməkdir ki, ya divar aralığında bir törəmə var, ya da miasteniya xəstəliyidir. Divar aralığında və yaxud ağciyərdə şiş olanda düşmüş göz qapağı geri qayıtmır. Amma miasteniya xəstələrində göz açılır, sonra yavaş-yavaş bağlanır, yəni gedib-gəlici simptomlar müşahidə olunur. Xəstə yorulanda göz qapağı düşür, səhər saatlarında aktiv olanda düzəlir. Daha sonra əsnək əzələlər boşaldığı üçün danışmada problemlər yaranır.

Miasteniya xəstəsinin timus vəzində törəmə varsa, müalicələr effektsiz olacaq. Xəstəliyi yüngülləşə bilər, amma effektli deyil. Bu halda birinci addım cərrahi planlama olmalıdır. Əgər şiş yoxdursa, dərmanla davam etmək olar. Tibbi ədəbiyyatda, dünya praktikasında, həmçinin bizim öz praktikamızda da sübut olunur ki, cərrahi müalicə yolu daha effektivdir. Əməliyyat zamanı timus vəzi çıxardılır.

Müxtəlif klinikalardan verilən məlumatlara istinadən, timektomiya (timus vəzinin çıxarılması) hər 100 xəstədən 60-80 nəfərində xəstəliyin tamamilə sönməsinə gətirib çıxarır. Ümumi statistikaya görə, əməliyyat olunan xəstələrin 80-90 faizi miasteniyadan tamamilə yaxa qurtarmış olur. Yerdə qalanların sağalması xəstəliyin fərdi inkişafı və digər faktorlardan asılıdır".

AYSEL SƏFƏRZADƏ

Telegramda izləyin