Çoxmənzilli binaların problemləri bu yolla həll oluna bilər - AÇIQLAMA - ÖZƏL

Günümüzdə çoxmənzilli binaların idarə edilməsində bir sıra problemlər var. MTK-larla bağlı narazılıqlar, binaların yeni idarəetmə formaları, qiymət haqlarının formalaşma mexanizmləri kimi məsələləri nümunə göstərə bilərik. Uzun illər keçməsinə baxmayaraq, mənzil mülkiyyətçilərinin yaşadıqları çoxmənzilli binalarda idarəetmənin təşkili ilə bağlı məsələlər hələ də həllini tapmayıb. Binalarda idarəetmənin düzgün təşkil olunmaması nəticədə istismar xərclərinin artmasına, sakinlər arasında qeyri-müəyyənliyə və bu kimi digər arzuolunmaz hallara gətirib çıxarır. Bəs görəsən, illərdir həll olunmayan və bir çox problemlərə yol açan bu məsələ nə zaman aradan qaldırılacaq?

Mövzu ilə bağlı Sonxeber.az hüquqşünas Arif Nəzərovdan münasibət öyrənib.

O bildirib ki, 1 oktyabr 2009-cu ildən qüvvəyə minən Azərbaycan Respublikasının Mənzil Məcəlləsində çoxmənzilli binaların idarə edilməsi üsulları konkret olaraq təsbit edilib:

"Belə ki, Məcəllənin 141-ci maddəsinə əsasən, çoxmənzilli binanın sahə mülkiyyətçiləri binanın bilavasitə mənzil mülkiyyətçilərinin müştərək cəmiyyəti (və ya ixtisaslaşmış istehlak kooperativi), yaxud idarəedici təşkilat tərəfindən idarə edilməsi üsullarından birini seçməyə borcludurlar. Bununla əlaqədar, sözügedən Məcəllənin 43-cü maddəsinə uyğun olaraq, idarəetmə üsulunun seçilməsi binanın sahə mülkiyyətçilərinin ümumi yığıncağının səlahiyyətlərinə aid edilib.

Həmçinin, qanunvericiliyin tələblərinə görə, ümumi yığıncaq sahə mülkiyyətçilərindən birinin təşəbbüsü ilə çağırıla bilər. Çoxmənzilli binanın sahə mülkiyyətçilərinin ümumi yığıncağı bütün səslərin 50%-dən çoxuna malik olan sahə mülkiyyətçiləri və ya onların nümayəndələri iştirak etdikdə səlahiyyətli hesab olunur".

Son bir neçə il ərzində çoxmənzilli binaların sakinlərinin təşəbbüsü ilə yeni idarəetmə üsullarının, ələlxüsus mənzil mülkiyyətçilərinin müştərək cəmiyyətlərinin yaradılması istiqamətində təşəbbüslər olub və nəticə etibarilə, ölkənin ayrı-ayrı regionlarında 200-dən çox cəmiyyətlərin yaradılmasına nail olunub. Sözsüz ki, qeyd olunan rəqəm çox kiçik göstəricidir. Bəs binalarda yeni idaretmə üsullarına keçidin kütləviliyinin təmin edilməsi üçün hansı addımlar atılmalıdır?

Bu məsələni şərh edən hüquqşünas, ilk növbədə, sahə mülkiyyətçilərinin hüquqi maarifləndirilməsinin vacib olduğunu vurğulayıb:

"Mənzil mülkiyyətçilərinin müştərək cəmiyyətlərinin qeydiyyatı prosedurlarının sadələşdirilməsinə, eyni zamanda çoxmənzilli binalarda yeni idarəetmə üsullarının tətbiqi prosesinin yekunlaşdırılması üçün bu istiqamətdə bütün nüansları özündə ehtiva edən tədbirlər planının hazırlanması və həyata keçirilməsinə ciddi ehtiyac var. 2019-cu ildən sonra mənzil münasibətləri sahəsində dövlət siyasətinin və tənzimləməsinin həyata keçirilməsi ilə məşğul olan qurumun olmaması binalarda yeni idarəetmə üsullarının tətbiqinin genişləndirliməsində ciddi çətinliklər yaradır".

Aysel SƏFƏRZADƏ

Telegramda izləyin