"Delyagin yerinə oturduldu" - Deputat

"Rusiya Dövlət Dumasının deputatı Mixail Delyaginin sərsəmləmələrini həm bu ölkə Prezidentinin sözçüsü, həm də Rusiyanın Azərbaycandakı səfirliyi vasitəsi ilə Xarici İşlər Nazirliyi pisləyərək rədd etdilər. Üzr videosundan da gördüyümüz kimi, Delyagin yerinə oturduldu".

Bu sözləri Sonxeber.az-a açıqlamasında deputat Bəhruz Məhərrəmov deyib.

O bildirib ki, Rusiya tərəfinin bu operativ reaksiyası təqdirəlayiq olmaqla müttəfiqlik münasibətimizin ruhuna uyğun davranış kimi yüksək qiymətləndirilməlidir:

"Lakin Mixail Delyaginin çıxışı özlüyündə təcavüzə və terrorçuluğa açıq çağırış, milli, irqi, sosial və ya dini nifrət və düşmənçiliyin salınması mahiyyəti daşıdığı üçün, ictimai formada səsləndirildiyi andan cinayət əməli törədilmiş oldu. Bu mənada Azərbaycan Respublikası Cinayət Məcəlləsinin 101.2, 214.2.3, 283.2.1 və 283.2.2-ci maddələri ilə cinayət işi başlanmaqla ibtidai istintaqın aparılması Baş Prokurorluğun İstintaq İdarəsinə həvalə olunması hüququn aliliyi adına mühüm addımdır.

Eyni zamanda, nəzərinizə çatdırım ki, ictimai formada yayımlanan bu fikirlər həm də Rusiya Federasiyası Cinayət Məcəlləsinin 205.2 və 354-cü maddələri başda olmaqla cinayətlərin məcmusu üzrə cinayət məsuliyyəti yaradır.

Bizim Məcəllənin 12.2-ci maddəsinə əsasən, əcnəbilər və vətəndaşlığı olmayan şəxslər Azərbaycan Respublikasının hüdudlarından kənarda Azərbaycan Respublikasının vətəndaşlarına, Azərbaycan Respublikasının maraqlarına (mənafelərinə) qarşı cinayət törətdikləri halda bu cinayətə görə xarici dövlətdə məhkum olunmadıqda bizim Məcəllə əsasında cinayət məsuliyyətinə cəlb edilə bilərlər. Əlbəttə, Rusiya tərəfi həmin əməllərə görə vətəndaşını özü cəzalandırmazsa, təbii ki, Delyagin barəsində müvafiq hüquqi prosedurlar həyata keçiriləcək və buna da heç kimin şübhəsi olmasın.

Eyni zamanda, baş verənlər Rusiya Azərbaycan müttəfiqlik münasibətlərinə kölgə salmamalıdır, çünki Delyaqin Rusiya demək deyil. Rusiya dövlətinin mövqeyini isə dövlət rəsmiləri aydın formada ifadə etdilər".

ZAİRA AKİFQIZI

Telegramda izləyin