"Məcburi köçkün olmayan o həyatı dərk edə bilməz..." - Əməkdar artistdən SƏMİMİ ETİRAFLAR - VİDEO

Azərbaycanlı muğam ifaçısı, Əməkdar artist Babək Niftəliyev "MTV" Azərbaycan kanalında yayımlanan "Üzə-düz" proqramının qonağı olub.

Sonxeber.az-ın məlumatına görə, muğam ifaçısı səmimi açıqlamaları ilə diqqət çəkib.

"30 il Vətən həsrəti ilə yaşadım. Məcburi köçkün həyatı, maddi sıxıntılarımız oldu. Öz evimizi tərk edib, haradasa məskunlaşdıq. Bu, çox ağır dərddir. Yadıma gəlir ki, 2 aprel 1993-cü il tarixində Kəlbəcər işğal olunanda biz Murovdağ yolu ilə, maşınların üstündə, karvanda gəlmişik. Qardaşım ağladı, atamdan su istədi. Atam bilmədi, nə etsin. Bir cam tapdı. Camı qarla doldurdu, ocaq qalayıb, isidib o suyu qardaşıma içirtdi. O səhnə mənim gözümdən getməz. Uşaq yaddaşı ağ vərəq kimidir, deyirlər. Danışdıqca kövrəlirəm. Həmişə demişəm ki, Gəncə mənim ikinci Vətənimdir. Çünki o şəhərin əhalisi bizə qucaq açdı. 8 yaşımda oradan məcburi çıxmışdım. Artıq mənim övladım 8 yaşında ora qayıdır. Yaşamayan kimsə məcburi köçkün həyatının nə olduğunu bilməz. Polun, "setka"nın üstündə yatmışıq. Paltarlarımızı yastıq əvəzi başımızın altına qoyurduq. 44 günlük Vətən Müharibəsi dönəmində mən də könüllü olaraq ordu sıralarına qoşuldum. Bununla da fəxr edirəm! Hələ Kəlbəcərə getməmişəm. Bilmirəm, gedəndə nə hisslər keçirəcəyəm. Bunu bir Allah bilir!"

Aysel SƏFƏRZADƏ

Telegramda izləyin