"Məktəblərdə, ailələrdə, mediada bu mövzuda geniş maarifləndirmə işləri aparılmalıdır"

"Son 1 həftə ərzində 2 məktəbli qız hündürmərtəbəli binadan özlərini ataraq intihar edib. Səbəblər sırasında imtahanda zəif nəticə və valideyn təzyiqi göstərilir. Səbəb nə olur olsun, gül balalarımızın gözlərimiz qarşısında özlərinə qıyması çox üzücüdür. Hesab edirəm, burada həm məktəblərin, həm də valideynlərin üzərinə ciddi vəzifələr düşür".

Sonxeber.az-ın məlumatına görə, bu sözləri ilahiyyatçı, Elm və təhsil komitəsinin üzvü, deputat Ceyhun Məmmədov deyib.
O bildirib ki, dinimizdə intihar ən böyük günahlardan sayılır:

"Məktəblərdə, ailələrdə, mediada bu mövzuda geniş maarifləndirmə işlərinin aparılmasına ciddi ehtiyac var. Burada məktəb psixoloqlarının da üzərinə ciddi vəzifələr düşür.

Həmçinin, valideynlər də övladları ilə münasibət və rəftarda çox diqqətli olmalıdırlar. Onlarla daha çox vaxt keçirməli, problemlərinə həssas yanaşmalı, təzyiqdən uzaq olmalıdırlar. Əks halda bu hadisələrin davamlı baş verməsinin şahidi olacağıq.

Dəyərli gənclər, siz də bilməlisiniz ki, intihar heç bir çətinlikdən çıxış yolu deyil. Bunu etməklə, böyük günah qazanmaqla yanaşı, sizi sevənlərə də böyük iztirab və kədər yaşadırsınız. Problem varsa, müzakirə etmək, çıxış yolu axtarmaq lazımdır. Allah bütün gül balaları qorusun".

ZAİRA AKİFQIZI

Telegramda izləyin