Deputatlar da "uşaq pulu" istədilər – "3 uşağı olan ailələrimiz niyə çoxuşaqlı hesab edilmir?"

"Uşaq pulu məsələsinə insan kapitalı aspektindən baxılmalıdır. Uşaq pulu keyfiyyətli təhsil, keyfiyyətli səhiyyə və keyfiyyətli qidaya çıxış deməkdir".

Bunu İqtisadi və Sosial İnkişaf Mərkəzinin rəhbəri Rəşad Həsənov Milli Məclisin deputatı Azər Badamovun ünvanlı sosial yardımın uşaq pulu ilə əvəzlənməsi təklifinə münasibət bildirərkən deyib:

"Pandemiyadan sonra uşaq pulu məsələsi daha da aktuallaşıb. Dünya təcrübəsi göstərir ki, hansı ölkələrdə əhalinin sosial müdafiəsi üçün dayanıqlı mexanizmlər varsa, həmin dövlətlərdə pandemiya məhdudiyyətləri əhalinin rifahına daha az zərbə vurub.

Çünki onların gəlir mənbəyinin böyük hissəsi davamlı hesab olunur. Xəstəlikdən qorunmağın preventiv üsullarından biri də sağlam qidalanmadır. Bu kimi məsələlər mövzunun əhəmiyyətini bir daha sübut edib".

Ekspertə görə, Azərbaycanda demoqrafiq vəziyyətin yaxşı olmaması da uşaq pulunu vacib edir:

"Keçən əsrin 90-cı illərində hər min nəfərə 20 nəfərdən artıq doğum olsa da, 2020-ci ildə göstərici 8,4-ə düşüb. Belə tempdə 2050-ci ildə isə 3,4 nəfərə düşəcək. Ünvanlı sosial yardım mexanizmi də dayanıqlı həll yolu deyil. Dövlətin pulu azalanda ona ayrılan vəsait də azalır. 2014-cü ildə 160-170 min ailə ünvanlı sosial yardım alırdı. 2015-ci il böhranından sonra isə artmalı olduğu halda, belə yardım alan ailələrin sayı 2-2,5 dəfə azaldı. Nəticədə ünvanlı sosial yardım böhran dövründə əhalinin rifahını dəstəkləmədi".

Deputat Fazil Mustada da həmkarının fikirlərinə dəstək verib:

"Hər ailəyə uşaqların sayına görə verilməlidir. Bu zaman çox uşaqlı ailənin müəyyənləşdirilməsi üçün say nisbətinin azaldılmasına da ehtiyac var. 3 uşağı olan ailələrimiz niyə çoxuşaqlı hesab edilmir? İndiki dövürdə onlar da çoxuşaqlı ailə hesab edilməlidir. Ünvanlı sosial yardım uşaq pulu ilə əvəzlənməlidir"./Bizim.Media

Telegramda izləyin