"Rəsmi Vaşinqton Azərbaycan Prezidentinin mahir diplomat olduğunun fərqindədir"
"ABŞ prezidenti Cozef Baydenin ölkəmizi müstəqillik günü ilə bağlı Azərbaycan Respublikasının Prezidenti cənab İlham Əliyevə ünvanladığı təbrik məktubu bir daha sübut edir ki, Birləşmiş Ştatlar Azərbaycanın regiondaki yerini, rolunu və çəkisini yüksək qiymətləndirir".
Bu sözləri Sonxeber.az-a Milli Məclisin deputatı, siyasi elmlər doktoru, professor Elman Nəsirov deyib.
Onun sözlərinə görə, ABŞ Azərbaycanla bundan sonra da strateji tərəfdaşlıq münasibətlərinin qorunub saxlanmasında və daha da inkişafında maraqlıdır:
"ABŞ prezidentinin ünvanladığı təbrik məktubunda bir sıra mühüm tezislər var ki, onları da aşağıdakı şəkildə qruplaşdırmaq mümkündür.
1. Birləşmiş Ştatlar Azərbaycanın beynəlxalq təhlükəsizliyə verdiyi töhfəsini, dünyada sülhün və təhlükəsizliyin təminatında oynadığı rolu yüksək qiymətləndirir.
2. Azərbaycan Respublikasının Avropanın və dünyanın enerji təhlükəsizliyinin təminatında oynadığı rolu yüksək dəyərləndirir. Birləşmiş Ştatlar prezidentinin mövqeyinə görə, Azərbaycanın bu istiqamətdə çəkisi daha da artmaqdadır və Azərbaycan bu gün Avropanın enerji təhlükəsizliyinə çox böyük töhfələr verməkdədir.
Bu həqiqətən də belədir. Azərbaycan indiki reallıqlar fonunda Avropa İttifaqının (Aİ) enerji təhlükəsizliyi üçün çox ciddi amilə çevirilib.
Ötən il Azərbaycan Aİ ölkələrinə 8.2 milyard kub.m qaz verib. Bu il onun 9 milyarddan çox olması proqnozlaşdırılır, gələn ildən isə 11 milyard kub.m-dən çox Azərbaycan qazı Avropa bazarına çatdırılacaq.
Bunlar bir daha onu göstərir ki, ABŞ Azərbaycanın oynadığı rolu izləyir, görür və yüksək qiymətləndirir.
Eyni zamanda ABŞ Azərbaycanın Beynəlxalq terrorizmə qarşı mübarizədə oynadığı rola böyük dəyər verir və fərqindədir ki, beynəlxalq terrorizmə qarşı mübarizə prossesinin ilk günlərindən Azərbaycan öndəgedən dövlətlər sırasında olub və bu istiqamətdə konkret əməli addımlara imza atıb.
Eyni zamanda, ABŞ prezidentinin təbrik məktubunda diqqətdən yayınmayan əsas məsələlərdən də biri Ermənistan-Azərbaycan münasibətlərinin normallaşdırılması ilə bağlı məqamların qabardılmasıdır. Cozef Baydenin mövqeyi belədir ki, o, iki dövlət arasında əlaqələrin intensivləşdirilməsinə maraqlıdır. Cənubi Qafqaz regionunda uzunmüddətli və davamlı sülhün əldə edilməsi üçün ABŞ öz töhfəsini vermək niyyətindədir və xüsusilə də Ermənistanla iqdisadiyyat, nəqliyyat sahələrində əməkdaşlığın və insanlararası münasibətlərin formalaşması üçün ABŞ öz dəstəyini göstərməyə hazırdır.
Ən mühüm məqamlardan biri də Azərbaycanın Ukrayna böhranı kontekstində davranışı ilə bağlı məsələlərə Baydenin diqqət ayırmasıdır.
Məktubda da qeyd olunur ki, Azərbaycan Ukraynanın suverlenliyini dəstəkləyir və bir neçə dəfə humanitar yardım göstərib. Bu məsələdə Azərbaycanın mövqeyi, atdığı addımlar rəsmi Vaşinqton tərəfindən yüksək qiymətləndirilir.
Ukrayna böhranı fonunda yaranmış qlobal qeyri-sabitlik məsələlərinə Bayden diqqəti cəlb edib və bu kontekstdə vurğulayıb ki, Azərbaycanın ərazi bütövlüyü, suverenliyi və müstəqilliyini ABŞ dəstəkləyir və bunu növbəti dəfə təsdiq edir.
Eyni zamanda, ABŞ prezidenti Azərbaycan ilə növbəti illərdə və onilliklərdə əlaqələrin daha da genişlənməsində və intensivləşməsində maraqlı olduğunu də ifadə edib.
Təbii ki, bütün bunlar bir daha onu göstərir ki, Amerika Azərbaycanda gedən bütün prossesləri diqqətlə izləyir, Azərbaycanın gücləndiyinin, regionda söz sahibi olduğunun, beynəlxalq sülhün və təhlükəsizliyin təminatına verdiyi böyük töhfənin fərqindədir.
Həm də onun fərqindədir ki, Azərbaycanın bütün bu tarixi nailiyyətlərinin əsasında Azərbaycan Prezidentinin müdrik siyasəti, onun yüksək idarəçilik qabiliyyəti və müasir beynəlxalq çağırışları düzgün qiymətləndirməsi və ondan irəli gələn adekvat addım atmaq bacarığı dayanır.
Bütün bunları Amerikanın ali siyasi rəhbərliyi görür və təbrik məktubunda da Azərbaycan Prezidentinə səslənən fikirlər bir daha təsdiqləyir ki, rəsmi Vaşinqton Azərbaycan Prezidentinin mahir diplomat olduğunun fərqindədir, Azərbaycan Prezidentinin müzəffər prezident olduğunu dərk edir, qiymətləndirir və bütün bunlardan irəli gələrək də Azərbaycanla uzunmüddətli əməkdaşlığın daha da genişləndirilməsi niyyətini ortaya qoyur".
ZAİRA AKİFQIZI
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş