"İlham Əliyevin uğurlu xarici siyasəti nəticəsində Azəbaycan oturduğu bütün diplomatik masalarda qalib və diqtə edən tərəfdir" - DEPUTAT

"Prezident İlham Əliyevlə Ermənistanın baş naziri Nikol Paşinyan arasında Brüsseldə keçirilən sonuncu görüşü Azərbaycanın diplomatik müstəvidə növbəti qələbəsi kimi də qiymətləndirmək olar".

Bunu Sonxeber.az-a açıqlamasına deputat Cavanşir Paşazadə deyib.

Onun sözlərinə görə, cənab Prezident İlham Əliyevin mayın 23-də "Azərbaycan Respublikası ilə Ermənistan Respublikası arasında dövlət sərhədinin delimitasiyası üzrə Dövlət Komissiyasının yaradılması haqqında" imzaladığı sərəncama baxan zaman görərik ki, Azərbaycanın yaratdığı komissiyanın tərkibi daha genişdir:

"Bu bir daha onu deməyə əsas verir ki, rəsmi Bakı sərhədlərə dair bir qarış torpağı belə, nə su resurslarını, nə meşə ərazilərini, cüzi də olsa, verib güzəştə getməyəcək.

44 günlük Vətən müharibəsindən öncə də cənab Prezident keçirilən bütün beynəlxalq tədbirlərdə Azərbaycanın torpaqlarının bir qarışını belə, güzəştə getməyəcəyini qeyd edib. Cənab Prezidentin mayın 23-də imzaladığı sərəncam bunu bir daha sübut etdi.

5 saata qədər davam edən Brüssel görüşü tarixə ölkəmizin növbəti siyasi-diplomatik uğuru kimi düşdü. Görüşdə cənab Prezident İlham Əliyev növbəti dəfə ölkəmizin dəyişməz mövqeyini diqqətə çatdıraraq Birinci Qarabağ müharibəsində itkin düşmüş insanların taleyi və azad edilmiş ərazilərin minalardan təmizlənməsi məsələsinə toxundu. Ən önəmlisi isə odur ki, görüş zamanı Azərbaycan tərəfinin irəli sürdüyü 5 baza prinsipi əsasında keçirilən müzakirələrdə "Dağlıq Qarabağ" ifadəsi işlədilmədi, beynəlxalq daşımalar çərçivəsində sərhəd idarəetmə prinsipləri, təhlükəsizlik, eləcə də gömrük rüsumları və qaydaları barədə razılıq əldə olundu, yaxın günlərdə sərhəddə Azərbaycan-Ermənistan Birgə Sərhəd Komissiyasının birinci iclasının keçirilməsi haqqında, sülh müqaviləsinin hazırlanması üçün xarici işlər nazirliklərinin nümayəndə heyətlərinin görüşməsi kimi mühüm qərarlar qəbul edildi. Əlbəttə, bütün amillər diplomatik qələbəmizlə yanaşı, həm də cənab Prezident İlham Əliyevin necə uzaqgörən siyasətçi olduğunu sübut etdi".

Deputat vurğulayıb ki, artıq Nikol Paşinyan da daxil olmaqla, Ermənistan hakimiyyəti yaxşı anlayır ki, 90-cı illərin əvvəllərindən fərqli olaraq, Azərbaycan güclü və qüdrətlidir:

"Məhz buna görə də Nikol Paşinyanın fərmanı ilə yaradılan komissiyanın tərkibi Ermənistanla dövlət sərhədinin bütün istiqamətləri üzrə detallı plan hazırlayacaq və delimitasiya Azərbaycan tərəfinin şərtləri əsasında aparılacaq. Ən önəmlisi isə odur ki, Qazaxın yeddi kəndi və Naxçıvandakı Kərki kəndi də delimitasiya prosesi çərçivəsində Azərbaycana qaytarılacaq, sərhədboyu yerləşən bəzi hissələr Azərbaycanın ərazisi kimi rəsmiləşdiriləcək.

Bundan əlavə, Zəngəzur dəhlizinin açılması ilə sərhədlərin delimitasiyası paralel aparılacaq. Yəni Zəngəzur dəhlizi sərhədlərin müəyyənləşməsi kontekstinin içərisinə salınacaq. Bununla da Ermənistan üçün böyükmiqyaslı təxribatlara heç bir "ayaq yeri" qalmır.

Bu gün cənab Prezident İlham Əliyevin uğurlu daxili və xarici siyasəti nəticəsində Azəbaycan oturduğu bütün diplomatik masalarda qalib və diqtə edən tərəfdir. Bizə bu möhtəşəm qələbələri yaşadan Ali Baş Komandanımıza, canları, sağlamlıqları bahasına ərazi bütövlüyümüzü bərpa edən şəhidlərimizə və qazilərimizə təşəkkür edirəm. Əminəm ki, cənab Prezident İlham Əliyevin başçılığı ilə ölkəmiz tək döyüş meydanında deyil, hər bir sahədə qalib tərəf kimi adınl tarixə qızıl hərflərlə yazdıracaq".

Aysel Yusifqızı

Telegramda izləyin