"Meymunçiçəyinin Azərbaycana gəlib çatma ehtimalı var" - İnfeksionist

Meymunçiçəyi virusu bir çox ölkələrdə yayılmaqdadır. Bəs bu virusun Azərbaycanda yayılma riski nə qədərdir və yayıldığı təqdirdə Azərbaycanın onun çoxalmasının qarşısını almağa resursları yetəcəkmi?

Bu barədə Sonxeber.az-a infeksionist-həkim Nicat Əzimli açıqlama verib:

O bildirib ki, Ümumdünya Səhiyyə Təşkilatının açıqlamasına görə, hazırda xəstəliyin qeyri-xarakterik ərazilərdə aşkarlandığı və bu insanların hansı səbəbdən xəstələndiyi məlum olmadığı üçün gələcəyi ilə bağlı da tam proqnoz vermək mümkün deyil:

"Nəzərə alsaq ki, bu insanlar xəstəliyin mənbəyi Afrikaya getmədən virusa yoluxlduqları üçün səbəb məlum deyil. Amma ümumi mənzərəyə baxanda son bir ayda xəstəliyin 13-15 ölkədə sürətlə yayıldığını görürürük. Belə sürətlə yayılmağa davam edərsə, meymunçiçəyinin Azərbaycana da gəlib çatmaq ehtimalı var.

Meymunçiçəyi yeni bir xəstəlik deyil. Virus insanlarda ilk dəfə 1970, heyvanlarda isə 1958-ci ildə aşkarlanıb, əvvəllər də bütün universitetlərdə, tibbi informasiya vasitələrində bununla bağlı məlumatlar yer alırdı və tibb-səhiyyə sistemi sözügedən xəstəliklə tanış idi. Koronavirus isə yeni xəstəlik idi və müalicəsi üçün heç bir preparat və ya peyvənd yox idi. Meymunçiçəyi koronavirus qədər çətin kontrol olunası xəstəlik deyil. Amma təbii ki, pandemiyadan çıxartdığımız dərs olaraq yayılmaqda olan infeksiyaya qarşı laqeyd yanaşmamalıyıq və Azərbaycana gəlib çıxma ehtimalı nəzərə alınaraq, bununla bağlı öncədən hazırlıqlar görülməlidir".

Şəbnəm Lətifi

Telegramda izləyin