"Zəngəzur dəhlizinin açılması tranzit yükdaşıma xərclərini azaldacaq"- Cavid Osmanov

Azərbaycan Respublikasının Prezidenti İlham Əliyev və birinci xanım Mehriban Əliyeva mayın 26-da Füzuli rayonuna səfər ediblər. Dövlət başçısı və birinci xanım səfər çərçivəsində Horadiz-Cəbrayıl-Zəngilan-Ağbənd avtomobil yolunun (Zəngəzur dəhlizi) tikintisi ilə tanış olublar.

Bununla bağlı Sonxeber.az-a açıqlama verən deputat Cavid Osmanov bildirib ki, dəhliz Azərbaycanla yanaşı, digər ölkələrin də iqtisadi inkişafına təkan verəcək:

"44 günlük Vətən müharibəsində cənab İlham Əliyevin rəhbərliyi ilə ermənilərin işğala məruz qoyduğu torpaqlar işğaldan azad edildi. Bununla da Azərbaycanın ərazi bütövlüyü bərpa olundu və Ermənistan kapiltulyasiya aktına imza atdı. Zəngəzur dəhlizinin açılması üçtərəfli imzalanan bəyanatda öz əksini tapdı. Son Brüssel görüşündən sonra Zəngəzur dəhlizinin artıq reallığa çevrilməsi istiqamətində vacib addımlar atıldı.

Döyüş meydanında əldə etdiyimiz tarixi qələbədən sonra diplomatik müstəvidə də cənab İlham Əliyev uğur qazanmağa davam etməkdədir. Əlbəttə ki, Zəngəzur dəhlizinin böyük siyasi, mənəvi və iqtisadi əhəmiyyəti var.

Birincisi, Zəngəzur Azərbaycanın tarixi torpağıdır, o zaman Azərbaycandan zorla alınaraq Ermənistana verililib. Artıq Prezident İlham Əliyevin prinsipiallığı nəticəsində Zəngəzur dəhlizinin açılması və Azərbaycanın əsas hissəsi ilə Naxçıvanın quru yolla birləşməsi deməkdir.

Digər tərəfdən, Zəngəzur dəhlizi türk dünyasını coğrafi yolla birləşdirən ərazidir. Mənəvi tərəfi ondan ibarətdir ki, Zəngəzur, az öncə qeyd etdiyim kimi, Azərbaycanın tarixi torpağı olub. Bu dəhlizin Azərbaycanla Naxçıvanı, bütövlükdə türk dünyasını birləşdirməsinin mənəvi əhəmiyyəti var. İqtisadi tərəfdən baxdıqda Prezident İlham Əliyevin rəhbərliyi ilə 2003-cü ildən bu günə kimi Azərbaycan çox əlverişli loqistika mərkəzinə, nəqliyyat dəhlizlərinin keçdiyi mərkəzə çevrilib. Bu dəhlizin açılması isə tranzit yükdaşıma xərclərini daha aşağı salacaq. Uzaq Çindən Avropaya kimi bu dəhlizin əhəmiyyəti böyükdür, çünki daha qısa yolla yükdaşımalar həyata keçiriləcək. Eyni zamanda, daha əlverişli bir tranzit xətti olacaq. Bu baxımdan, həm Azərbaycan, həm digər ölkələr Zəngəzur dəhlizi açıldıqdan sonra çox böyük iqtisadi dividentlər götürəcək. Dəhliz Azərbaycanla yanaşı, digər ölkələrin də iqtisadi inkişafına təkan verəcək".

Şəbnəm Lətifi

Telegramda izləyin