Kirayə qalmağa ev tapmayan oğlanlar nə etsinlər? - Ekspertdən AÇIQLAMA

"Qızlar üçün kirayə ev", "ailəli şəxslərə kirayə ev" tipli elanları çox gördüyümüz halda "oğlanlar müraciət etməsin" tipli elanlara da rast gəlirik. Bakının "ev kirayəsi" məsələsi oğlanlar üçün bir dərddir. İstər tələbə, istər işləyən və ya sadəcə yaşamağa ev axtaran oğlan ev tapmaqda çətinlik çəkir.

"Qurunun oduna yaş da yanır" burda deyiblər. Mənzil sahibi bir dəfə oğlana kirayə ev verib, mənfi halla rastlaşdıqda ikinci dəfə bu cinsin nümayəndələrinə evini həvalə etmək istəmir.

Bu gün evini kirayə verənlərin əksəriyyəti xanımlara üstünlük verir. Belə yerdə deyiblər, "adamın adı çıxınca canı çıxsın".

Bəs bunun səbəbi nədir ?

Mövzu ilə bağlı Sonxeber.az saytına əmlak məsələləri üzrə ekspert Ramil Qasımzadə fikir bildirib.

O, elanlarda adətən xanımlara müraciət olunduğunu təsdiqləyib:

"Kirayə verənlər adətən evli şəxs və ya qız kirayəçi axtarırlar. Bunun səbəbi isə oğlanların evi səliqəsiz saxlamaları, ev əşyalarına zərər yetirib xarab eləmələridir. Çox zaman kirayə üçün müraciət edəndə ev sahibi qalan şəxslərin genderini araşdırmaqda maraqlıdır. Adətən kirayə qalan şəxslər evi tez müddətdə tərk etdikləri üçün sahibkarlar seçim zamanı ehtiyat edirlər".

Ekspert bildirir ki, kirayə qalan şəxs və sahibkar arasında müqavilə bağlanmalıdır:

"Təsssüf ki, hazırkı zamanda bir çox sahibkarlar müqavilə bağlamaqdan boyun qaçırırlar. Müqavilədə evdə yaşayan zaman əşyalara zərər gəlməyəcəyi və sahibkarın qoyduğu başqa şərtlər qeyd olunur".

Bəs makler adlandırdığımız şəxslərin rolu nədən ibarətdir?

Ekspert əlavə edib ki, onlar sadəcə vasitəçidirlər. ev tapmaqda yardım edib, qarşılığında müəyyən miqdarda pul alırlar.
AYSEL QULİYEVA

Telegramda izləyin