Azərbaycanın bu adasında nəqliyyat PULSUZ, spirtli içki gətirmək QADAĞANDIR - FOTO

Ölkəmizin ən təmiz çimərliklərinin yerləşdiyi, nəqliyyatın pulsuz və spirtli içki gətirməyin qadağan olduğu ada haqqında məlumatınız varmı? Azərbaycanın ən şərqində daimi yaşayış məntəqəsi olan Çilov adası Vatikandan 25 dəfə böyükdür.

Sonxeber.az "Gəzəyənlər" adlı "Facebook" qrupunda bu ada haqqında səyahət bloqeri Elşən İsmayılovun verdiyi məlumatı oxuculara təqdim edir.

Çilov adasına necə getmək olar?

Əvvəlcə "SOCAR" və ya Pirallahı Rayon İcra Hakimiyyətindən icazə sənədi almaq lazımdır. Bundan sonra gəmi, yoxsa helikopterlə gedəcəyinizə qərar verməlisiniz. Hər ikisi pulsuzdur.

Helikopterlə getmək üçün "Koroğlu" metrostansiyası ətrafında Bakı kəndlərinə gedənləri səsləyən taksi sürücülərindən Artyoma (Pirallahı) gedənləri tapın və "Vertolyotnu"da düşəcəyinizi deyin. Qiymət adambaşı 3 manatdır, hər beş-on dəqiqədən bir taksilər hərəkət edir. Vertolyotla səyahət 8-12 dəqiqə çəkir.

Gəmi ilə getmək istəyirsinizsə, Zığ limanına getməlisiniz. Buradan "Qarayev" və "Üfüq" gəmiləri 3-4 saata, digər sovet dövründən qalan gəmilər isə 6-7 saata gedir. Səyahətin dərəcəsi orta-ağırdır. Fiziki olaraq hazır deyilsinizsə gəmini yaddan çıxarın.

Hər iki halda adada sizi ilk olaraq Socar Təhlükəsizlik idarəsinin əməkdaşları qarşılayacaq, bir-iki sualdan sonra içəri keçəcəksiniz. Adada fəaliyyət göstərən avtobuslar da pulsuzdur.

Adanın tarixi:

1949-cu ildə şəhər tipli qəsəbə statusu verilib.

Rus hidroqrafı F. İ. Soymonov 1763 ildə qələmə aldığı kitabında yazır:
"Körfəzin sonunda "Jiloy" adası var. Orada yaşayış əlaməti yoxdur. Bununla belə, Stepan Razin adlı quldur bir müddət adaya yerləşib və sahil bölgələrinə basqınlar təşkil edib.

Adanın qədim adı farsca "Renus" adlanıb. "Renus" - "sehirli daş" deməkdir. "Renus" haqqında əfsanədə deyilir ki, kim bu daşdan üzük taxsa, bir ömür boyu xoşbəxt olacaq.

XX əsrin əvvəllərindən ortalarınadək Çilov adasında əsasən Rusiyadan sürgün olunanlar yaşamışlar. Onların əsas məşğuliyyəti balıqçılıq, suiti ovu olub.

İkinci Dünya müharibəsindən sonra Azərbaycan geoloqları, geofizik alimləri axtarış-kəşfiyyat işlərini genişləndirərək Çilov neft yatağını kəşf etmiş, dənizin dərinliklərinə doğru irəliləyərək Neft Daşlarının kəşfi zamanı buranı özlərinə qərargah seçiblər.

Çox keçmədən Çilovda Yeni qəsəbə salınıb, əhalinin sayı artıb. Əvvəlcə rusların daha çox yaşadığı adada hazırda əksəriyyət Masallı, qismən Qazax rayonundan miqrasiya edən ixtisaslı kadrlardır, ruslar isə yenə də var.

Adanın maraqlı yerləri:

1. Taxta evlər. Adanın özünəməxsus taxta evləri əslində buranı Santorini edəcək qədər gözəl ola bilərdi, ancaq baxımsızlıqdan çoxu dağılıb gedir.
2. Mayak. XIX əsrdə tikilib, adanın hər yerindən görünür.
3. Urnos (kiçik Çilov adası). Burada insan yaşamır, ağac da yoxdur, gözəl çimərliyi var.
4. Köhnə qəsəbə. İlk sakinlər burada, yəni adanın şimal hissəsində məskunlaşıblar.
5. Yeni qəsəbə. Neft tapıldıqdan sonra yeni yaradılan, müasir qəsəbə. Məktəb, bağça və xəstəxanalar buradadır.
6. Çimərliklər. Adanın neftdən sonra ən böyük sərvəti təmiz çimərlikləridir. Təmizdir, dərin deyil.
7. Rus qəbiristanlığı. Maraqlı köhnə qəbir daşları və xaçlar var, əslində tarixdir, qorunmalıdır.
8. Park. Mövcud şəraiti nəzərə alsaq, çox gözəl parkdır, ümumiyyətlə, adanın yaşıllaşmasında əməyi keçənlərə böyük təşəkkür düşür, söhbət zəhmətkeş MKT (JEK) əməkdaşlarından gedir.
9. Stadion. SOCAR-ın ada əhalisinə etdiyi ən böyük yaxşılıqlardan biri bu stadiondur. Gənclər axşamlar burada futbol və voleybol oynayırlar, bəzən maraqlı yarışlar da keçirilir.
10. "Göz yaşları" restoranı. Adada bir turistin yemək yeyə biləcəyi yeganə yer "Göz yaşları" restoranıdır. Restoranın adını burada yemək yeyənlər qoyub. Əvvəllər həm də "Muxtar kafe" var idi, indi isə rəqabət yoxdur. Adada sifarişlə çox dadlı kütüm, berj, vobla, kefal, sületka, zalom və imkanınız varsa, nərə balığı da yeyə bilərsiniz.
11. Məscid. Keçən əsrdə tikilmiş Şiə-İsna Aşəriyyə məscidi. Hazırda da azan oxunur, namaz qılınır.
12. Hərbi hissə.
13. Bayraq meydanı. Hazırda respublikada ən böyük bayraq meydanı Çilov adasındadır.

Ada haqqında bunu da bilmək maraqlıdır:

Çilova "iydə ətirli ada" da deyirlər. Quraqlığa davamlı olduğu üçün adanın küçələri iydə və yasəmən ağaclarıyla doludur və hər tərəfdən gözəl iydə və yasəmən qoxusu gəlir.

Son onillikdə ümumilikdə 100 mindən çox zeytun, küknar, eldar şamı, əncir və digər həmşəyaşıl ağaclar əkilib, bu da adanı gözəlləşdirir və daha maraqlı edir.

Çilov sakit yerdir. Ancaq avtobuslar, idarə maşınları və bir neçə şəxsi avtomobil var. Cəmi bir polis var, onun da əksər vaxtı boş olur, yol polisi yoxdur. Adanın daxili qaydalarına görə, bura spirtli içki və narkotik vasitələr gətirmək olmaz, ancaq qəsəbənin dükanlarında spirtli içki satılır.

Əvvəllər qəsəbə sakinləri toylarını adada etsələr də, son illər Bakıda edirlər.

Adada gəzərkən adamın ruhu dincəlir. Sakit, təmiz, baxımlı küçələri, yaşıllıq, köhnə evlər, dənizin, qağayıların səsi və s.

Getmək istəyənlərə xoş istirahətlər!

AYSEL QULİYEVA

Telegramda izləyin