Burun axmasına qarşı nə etməli - MƏSLƏHƏT

Zökəm orqanizmin qoruyucu reaksiyalarından biridir. Burnun daxilində xüsusi hüceyrələr var. Bu hüceyrələr selik ifraz edir. Bu seliyin olması çox vacibdir. Selik burun boşluğuna nəfəsalma zamanı düşən toz, mikroblar, virusları və s. yuyub aparır. Mikrobların və ya virusların sayı artdıqda seliyin miqdarı da artır. Orqanizm bununla mikrob və viruslardan tez bir zamanda azad olmağa çalışır. Məhz bu səbəbdən bakterial və ya virus infeksiyaların ilk simptomlarından biri zökəmdir. Zökəm zamanı burnumuzdan gün ərzində 2 l qədər selik ifraz oluna bilər.

Virus infeksiyası zamanı burundan şəffaf selik, bakterial infeksiyası zamanı sarılı-yaşıllı irinə oxşar maye ifraz olunur.

Zökəm mütləq müalicə olunmalıdır. Uzun müddət ərzində müalicə olunmayan zökəm haymorit kimi ağır fəsadın inkişafına səbəb ola bilər.

Lor həkimləri zökəm zamanı xəstələrə tövsiyələr verir. Sonxeberaz saglamolun.az-a istinadən həmin tövsiyələri təqdim edir:

1. Parça dəsmallardan deyil, birdəfəlik kağız dəsmallardan istifadə edin. Bu, ifraz olunmuş mikrobların yenidən burun boşluğuna düşməsinin qarşısını alır.

2. Burnunuzu təmizləyəndə əvvəl burnun bir hissəsini (bu zaman digər hissəsini barmaqla sıxmaq lazımdır), sonra o biri hissəsini təmizləyin.

3. Burnunuzu təmizləyəndə ağzınızı bir qədər açıq saxlayın. Bu, mikrobların burunla qulağı daxildən birləşdirən yevstaxi borusu ilə qulağa düşməsinə və burada iltihabın inkişafına mane olacaq.

4. Maye qəbulunu artırın.

5. Zökəm zamanı adətən damardaraldıcı damcılardan istifadə olunur. Bu damcılar çox yaxşı kömək edir, ödemi azaldır və seliyin daha asan axmasına kömək edir. Lakin bu damcıları 7 gündən artıq istifadə etmək olmaz.

6. Zökəm zamanı xalq təbabəti vasitələrindən xardal əlavə olunmuş isti ayaq vannaları yaxşı kömək edir. 5 l isti suya 3 x.q. xardal tozu tökün. Yatmazdan əvvəl bu suda ayaqlarınızı 15 dəqiqə saxlayın, sonra yaxşı qurulayın və yun corab geyinin.

7. Zəncəfil çayı da soyuqdəymə və zökəm zamanı ən sınanmış vasitələrdən biridir. 3-4 sm olan zəncəfil kökü sürtgəcdən keçirilir, 1 stəkan qaynar suda 20-30 dəqiqə ərzində dəmlənilir, süzülür, bal və limon əlavə olunur.

Telegramda izləyin