"Azərbaycan tarixində ən böyük amnistiya aktı gözlənilir" - AÇIQLAMA

"Azərbaycan tarixində ən böyük amnistiya aktı gözlənilir. Azərbaycan Respublikasının Prezidenti İlham Əliyev tərəfindən suverenliyimizin tam bərpa olunması və Konstitusiyamızın qəbul edilməsinin 30 ilinin tamam olması ilə əlaqədar "Konstitusiya və Suverenlik" ili çərçivəsində ölkəmizdə ən böyük amnistiya təşəbbüsü irəli sürülüb. Bu qərar çox mühüm ictimai-siyasi, hüquqi və mənəvi addımdır. Eyni zamanda, amnistiyaya düşəcək minlərlə insanın yüz minlərlə doğma və yaxınlarının sevincinə səbəb olacaq. Qərarın ölkəmizdə 20 minə yaxın şəxsi əhatə edəcəyi gözlənilir. Hətta bu rəqəmin 20 mindən çox ola biləcəyi istisna edilmir. Onlardan 5 mindən çox məhkumun azadlıqdan məhrumetmə cəzasından azad ediləcəyi, həmin cəzaya məhkum olunmuş 3 mindən artıq şəxsin cəzasının azaldılacağı, 7 mindən çox məhkumun azadlığın məhdudlaşdırılması cəzasından, 4 minə yaxın məhkumun isə azadlıqdan məhrumetmə ilə bağlı olmayan digər cəzalardan və ya şərti tətbiq edilmiş cəzalardan azad ediləcəyi, həmçinin mindən çox şəxsin cinayət məsuliyyətindən azad olunacağı proqnozlaşdırılır".

Bu sözləri Sonxeber.az-a Milli Məclisin deputatı Pərvanə Vəliyeva danışıb.

O, açıqlamasında qeyd edib ki, bu təşəbbüs Dövlət başçısının humanizm və mərhəmət prinsiplərinə verdiyi yüksək önəmi nümayiş etdirir və cəmiyyətdə həmrəyliyin gücləndirilməsinə yönəlmiş mühüm addımdır:

"Amnistiya aktının layihəsinə əsasən, Azərbaycan Respublikasının suverenliyinin və ərazi bütövlüyünün müdafiəsi naminə aparılan döyüş əməliyyatlarında, o cümlədən Vətən müharibəsində və 2023-cü il 19-20 sentyabr tarixlərində keçirilmiş antiterror tədbirlərində iştirak etmiş şəxslərin, habelə həmin əməliyyatlar zamanı həlak olmuş və ya itkin düşmüş şəxslərin yaxın qohumlarının, Ermənistan Respublikasının mülki əhaliyə qarşı hərbi təxribatları nəticəsində əlil olmuş şəxslərin cəzadan və ya cinayət məsuliyyətindən azad edilməsi nəzərdə tutulur. Layihə eyni zamanda qadınlara, 60 yaşına çatmış şəxslərə, cinayət törədərkən yetkinlik yaşına çatmayanlara və digər kateqoriyalara da şamil olunur. Amnistiyadan yararlanacaq şəxslərin gələcəkdə qanunlara hörmətlə yanaşaraq dövlətimizin inkişafına töhfə verəcəklərinə inanırıq.

Qeyd edək ki, Azərbaycanda amnistiya aktları humanizm, mərhəmət və sosial ədalət prinsiplərinə əsaslanan hüquqi mexanizmlərdən biridir və müəyyən kateqoriyadan olan şəxslərin cinayət məsuliyyətindən və ya cəzadan tam və ya qismən azad edilməsini nəzərdə tutur. Amnistiya aktlarının əsas məqsədi cəmiyyət üçün təhlükə yaratmayan, törətdiyi əmələ görə islah olunma potensialı olan şəxslərə yenidən sosial həyata qayıtmaq imkanı yaratmaqdır.

Müstəqillik dövründə ölkəmizdə 70-ə yaxın əfv sərəncamı və 10-dan çox amnistiya aktı qəbul edilib. Ümummilli lider Heydər Əliyevin böyük humanizm və mərhəmət hisslərindən irəli gələn qərarları nəticəsində onun prezidentliyi dövründə ümumilikdə 7 amnistiya aktı qəbul olunub. Müxtəlif illərdə Azərbaycanın Birinci vitse-prezidenti Mehriban xanım Əliyevanın irəli sürdüyü amnistiya təşəbbüsləri on minlərlə insanı əhatə edib.

2021-ci ildə Vətən müharibəsində qazanılmış tarixi Qələbənin birinci ildönümü ilə bağlı Azərbaycan Respublikasının Prezidenti tərəfindən irəli sürülmüş təşəbbüsü Milli Məclis dəstəkləyərək, 8 Noyabr - Zəfər Günü münasibətilə amnistiyanın elan edilməsinə qərar vermişdi. Həmin amnistiya aktı 17 267 şəxsə şamil olunmuşdu. Bu qərar tətbiq edilən şəxslərin sayına görə həmin vaxta qədər qəbul edilmiş ən geniş amnistiya olub.

Azərbaycanda amnistiya aktları yalnız hüquqi prosedur deyil, eyni zamanda dövlətin sosial məsuliyyətinin, ədalət və mərhəmət dəyərlərinə sadiqliyinin təzahürüdür. Prezidentin bu təşəbbüsü xalqımızın həmrəyliyinə, cəmiyyətlə dövlət arasında etimadın daha da möhkəmləndirilməsinə və hüquqi dövlət prinsiplərinin dərinləşməsinə mühüm töhfə verəcəkdir".

Vüsalə İbrahimli

Telegramda izləyin