Müəllimlərin YENİ TƏKLİFİNƏ təhsil ekspertindən ETİRAZ

Son zamanlar məktəblərdə keçirilən imtahanlar ətrafında baş verən bəzi hadisələr neqativ rəy formalaşdırıb. Buna səbəb kimi isə müəllimlər yeni təklif ilə çıxış ediblər. Belə ki, onlar məktəblərdə hər dərs üçün iki müəllimin cəlb edilməsi fikri ilə çıxış ediblər. Müəllimlərin fikrincə, onlardan biri şagirdlərə dərsi tədris etdiyi zaman, digəri isə qiymətləndirmə ilə məşğul olmalı, KSQ, BSQ hazırlayıb yarımillik və illik qiymətlərə nəzarət etməlidir.

Təklifi irəli sürən müəllimlər qeyd edib ki, bu hal həm işsiz minlərlə insanı işlə təmin etməyə kömək edəcək, həm də şagirdləri dərs prosesindən yayındırmayacaq.

Sonxeber.az məsələ ilə bağlı öz fikirlərini Ednews-la bölüşən təhsil eksperti Elçin Əfəndi səsləndirilən təklifi cəfəngiyat adlandırıb.

"Bu vəzifələr üçün texniki işçilərin işə götürülməsi və onların müəllimlərin əvəzinə bir sıra işləri yerinə yetirməsi yolverilməzdir. Bu, müəllim adına qarşı hörmətsizlikdir. Müəllim pedoqoji peşə sahibidir və onun vəzifə borcu təhsil verməkdir. Bu vakant yerlərin doldurulması üçün verilən təklif kimi irəli sürülübsə belə, yenə də çıxış yolu deyil. "Məktəblinin dostları" layihəsi var, bundan başqa işə digər texniki işçilər cəlb etmək olar və ya elektron, kağız jurnalı ləğv etmək olar".

Ekspert çıxış yolunu məktəb saylarının artırılmasında gördüyünü bildirib. Onun sözlərinə görə, müəllimlərin vakansiya sayının artırılması üçün belə şeylər düşünmək və ya etmək mənasızdır.

"Problemi aradan qaldırmaq üçün ilk növbədə ümumtəhsil müəsisələrinin sayını artırılmalıdır. Qanunla bir sinifdə maksimum 25 şagird olduğu halda, bizələrində 30-40, hətta 50 nəfər uşaq var. Vakant yerləri həqiqətən də problem kimi önə çıxarmaq istəyiriksə dediyim problemləri aradan qaldırmaqla 20 minə yaxın yeni iş yeri açıla bilər. Amma təəssüf ki, kiminsə kiməsə gücü çatmır, kimsə dərəbəylik edir bu da belə cəfəngiyyat fikirləri səsləndirməyə gətirib çıxarır".

İşsizlik probleminə gəlincə isə...

Elçin Əfəndi işsizlərin önəmli problemi olan vakansiya çatışmazlığından da danışıb.

"İşsizlik problemini aradan qaldırmaq üçün müasir innovasiya ilə ayaqlaşmayan, informasiya texnologiyalarından anlayışı olmayan şəxslər ələnməli, onların yerinə yeni işçilər götürülməlidir. İkincisi isə tanış və tapşırıqla işə düzələnləri aradan qaldırıb yerlərinə həqiqətən də işin sahibini qoysalar indi vakansiya 9 min nəfər üçün deyil, 15-16 minə yaxın olardı".

Telegramda izləyin