Londonda Azərbaycan səfirliyinə hücum təşkil edən Yasir əl-Həbib kimdir? - İlahiyyatçıdan AÇIQLAMA

4 avqust 2022-ci il tarixində Azərbaycan Respublikasının Böyük Britaniya və Şimali İrlandiya Birləşmiş Krallığındakı səfirliyi bir qrup radikal dini dəstənin hücumuna məruz qalıb.
Dini dəstənin küveytli din xadimi Yasir Əl-Həbibin tərəfdarları olduğu bildirilir.
Bununla bağlı Sonxeber.az-a danışan Azərbaycan İlahiyyat İnstitutunun rektoru Aqil Şirinov bildirib ki , Yasir əl-Həbib bir neçə dəfə həbs olunub və hazırda İngiltərədə məzhəblərarası ixtilaf yaymaqla məşğuldur:
"Londondakı səfirliyimizə hücum edənlər "Mehdinin xidmətçiləri" adlanan radikal dini qruplaşmadır. Bu qruplaşmanın lideri Yasir əl-Həbibdir. Küveyt əsilli bir şəxsdir. O, Küveytdə başqa məzhəblərin müqəddəslərini təhqir etdiyinə görə 2004-cü ildə 10 il müddətinə həbs olunub. Bir neçə ay sonra Küveytin müstəqillik günü münasibətilə azad olunub. Bir neçə gün sonra yenidən həbsinə qərar verilib, amma o, Küveytdən qaçmağı bacarıb. Küveytdən İraqa, İrana, daha sonra İngiltərəyə gedib və orada sığınacaq alıb."Mehdinin xidmətçiləri"nin Britaniyada Əl-Mühəssin adlı məscidləri var. Eyni zamanda onların "Fədək" adlı bir kanalı var. Bu kanal radikal məzhəbçi, məzhəblərarası münasibətlərə zərər vuracaq fikirlər yayırlar. Yasir əl- Həbİb özü də bu fikirləri yayır, şiə-sünni ixtilafı çıxararaq müsəlmanları böləcək fikirləri gündəmə gətirir. Buna görə də İslam dünyasında onların hörməti yoxdur. Çox az bir qrup, xüsusilə, ərəb ölkələrindəki radikal qruplar onları dəstəkləyirlər. Bu son addım göstərdi ki, onlar heç bir dəyərə malik insanlar deyillər. Azərbaycan bayrağının içində islami dəyərlər də var. Yaşıl rəng İslamı təmsil edir. Onlar özlərini İslama aid edirlərsə, İslamın simvolu olan bayrağı yerə atmaları onların nəyə qulluq etdiyini göstərir. Əlbəttə ki, onların bu hərəkətləri Azərbaycan xalqında radikal qruplaşmalara qarşı nifrəti daha da artırır. Çünki bu insanlardan heç bir dövlət və millət xeyir görməyib. Onların hərəkətləri millətlərarası, dövlətlərarası, həmçinin məzhəblərarası ədavətə istiqamətlənib.
Azərbaycanda tarixən tolerantlıq, dinlərarası və məzhəblərarası harmoniya hökm sürüb. Belə qruplaşmaların fəaliyyəti bu harmoniyanı poza bilməz. İslamın iki böyük məzhəbinin nümayəndələri tarixən Azərbaycanda fəaliyyət göstərib və bu gün də belədir. Radikal qrup nümayəndələrinin şüarlarına baxdıqda guya Əhli-beyti müdafiə edirlər, amma onlar Əhli-beytin irəli sürdüyü dəyərləri bilsəydilər, belə hərəkət etməzdilər. Onların hərəkətləri Əhli-beytin dəyərlərinə ziddir. Azərbaycanda Əhli-beytə həmişə hörmət olub. Məzhəbindən asılı olmayaraq Azərbaycan xalqının nümayəndələri imam Hüseynə ehtiram göstəriblər. İmam Hüseynin qardaşlığa əsaslanan dəyərlərini bu radikal qrup insanların gözündə düşmənçilik dəyərləri kimi göstərməyə çalışırlar. Bu qrupun nə imam Hüseynlə, nə də Əhli-beytlə əıaqəsi var. Son hərəkət də bir daha bunu sübut etdi".

Şəbnəm Lətifi

Telegramda izləyin