Gürcüstan Azərbaycanla Ermənistan arasında vasitəçi ola bilər? - RƏY

Gürcüstanın Baş naziri İrakli Qaribaşvili BMT Baş Assambleyasının 77-ci sessiyasındakı çıxışı zamanı Gürcüstanın Ermənistanla Azərbaycan arasında vasitəçi olmağa hazır olduğunu bildirib.

Gürcüstanın vasitəçiliyi Azərbaycan və Ermənistanı sülhə gətirə bilərmi?

Mövzu ilə bağlı Sonxeber.az-a danışan politoloq Elxan Şahinoğlu bildirib ki, Ermənistan tərəfinin niyyəti yoxdursa, üçüncü tərəfin sülh missiyasından nəticə əldə oluna bilməz. Üçüncü tərəflər əsirlərin qaytarılması və ya mübadiləsi yönündə fəaliyyət icra edirlər, amma yekun sülh sazişi üçün Ermənistanın niyyəti olmadığına görə bu mümkün olmayacaq:
"İndiki mərhələdə sülh yarada biləcək tərəf varsa, bu, Ermənistandır. Kimin vasitəçilik etməyindən asılı olmayaraq, Ermənistan Azərbaycanın üçtərəfli bəyanatda göstərdiyi şərtlərə uyğun mesaj verməlidir. Ermənistan baş naziri Paşinyanın BMT kürsüsündə çıxışı zamanı sülhə yönəlmiş heç bir mesaj görmədik. Paşinyan Azərbaycana müharibə elan etmiş kimi göründü. Artıq bizim təmas xəttimizdə olacaq ərazilərdə Ermənistan beynəlxalq qüvvələrin yerləşdirilməsi təklifini irəli sürüb. Yəni kimin vasitəçi olmasından asılı olmayaraq, ortada Ermənistanın niyyəti yoxdur. Ermənistan tərəfinin niyyəti yoxdursa, üçüncü tərəfin sülh missiyasından nəticə əldə oluna bilməz. Ermənistan sülh sazişi yönündə müsbət mesajlar versə, bizə vasitəçi də lazım olmaz. Vasitəçilərin rolu tərəfləri masada razılaşdırmaq olur. Nensi Pelosinin Ermənistana səfəri və Paşinyanın BMT-də çıxışından sonra sülh sazişinə getməkdən daha çox eskalasiyanın mövcud olacağını sezdim. Paşinyanın beynəlxalq kürsüdə çıxışında sülhə yönəlik mesaj verilmədi. Əksinə, üçtərəfli bəyanatda göstərilən müddəaların da arxasında durulmadı. Ona görə də üçüncü tərəfin vasitəçiliyinin müsbət addım olacağını düşünmürəm. Təbii ki, Gürcüstan bizim qonşu dövlətimizdir. Siyasi, iqtisadi əlaqələrimiz yüksək səviyyədədir, amma sülh vasitəçiliyini kimin etməsindən asılı olmayaraq Ermənistan buna razı olmayacaq. Üçüncü tərəflər əsirlərin qaytarılması və ya mübadiləsi yönündə fəaliyyət icra edirlər, amma yekun sülh saziş üçün Ermənistanın niyyəti olmadığına görə bunun mümkün olacağını düşünmürəm. İndiki mərhələdə Ermənistanı sülhə gətirməyin Gürcüstandan daha çox Rusiyadan asılı olduğunu düşünürəm. Gürcüstanla Ermənistanın münasibətləri sırf siyasidir, amma Ermənistan gücdən anlayır. Onun üzərinə həm siyasi, həm hərbi güc və hər hansı təzyiqi göstərəcək tərəf Rusiyadır. Çünki Rusiyanı neytrallaşdırmaq üçün Nensi Pelosinin Ermənistana səfəri onları əks istiqamətə getməyə ruhlandırdı. Yəni artıq Rusiyanın təsirindən çıxma vəziyyətinə girdi. Ermənistanı sülhə məcbur edən Rusiya ola bilərdi, ancaq onlar rusiyadan qopma meylinə giriblər. ABŞ da Ermənistanı əks yöndə cəsarətləndirir. Ermənistan bu eskalasiyanın nə ilə nəticələnəcəyini hələ də bilmir. Ermənistan təxribat edib sonra da BMT- də şikayət edir. Əslində burda çözüləcək məsələ Ermənistandadır. Ermənistan sanki eskalasiyanın artmasına maraqlı kimi görünür".

Şəbnəm Lətifi

Telegramda izləyin