Avtobuslarda gediş haqqı artırılacaq? - AÇIQLAMA

"İctimai nəqliyyatda hərəkət qiymətləri uzun müddətdir ki eynidir. Amma bu dövrdə çox şey dəyişib. Yeni avtobusların qiyməti, sərnişin daşımada əsas şərtlərdən biri olan yanacağın qiyməti bahalaşıb. Ehtiyat hissələri, təmir xərcləri də təbii ki qiymət dəyişikliyinə təsir edir".

Bunu Sonxeber.az-a iqtisadi ekspert Xalid Kərimli deyib.

O bildirib ki, istismarla əlaqədar xərclər artıb.
"Yenidən qiymətlər təhlil edilməsə, özəl sektor ciddi çətinliklərlə rastlaşıb, müflis ola bilər. Onlar xərclərini qarşılamaqdan əlavə borclarını belə qaytara bilməyəcəklər, yeni avtobuslar ala bilməyəcəklər. Tarif Şurası təbii ki onların xərclərinin dəyişməsinə baxmalıdır. Sərnişin daşımanın maya dəyərinin necə dəyişməsini təhlil eləməlidir. Daha sonra real vəziyyətə uyğun olaraq daşıma qiymətlərinə baxılması daha məqsədə uyğundur. İctimai nəqliyyatdan əhalinin daha çox sosial cəhətdən həssas təbəqələri geniş istifadə eləyir. Qiymət artımı baş verərsə, bu əhalinin büdcəsinə mənfi təsir göstərəcək.Gediş haqqının 30 qəpikdən 50 qəpiyə artırılması Tarif Şurasının səlahiyyətindədir.Düşünürəm ki, sosial həssaslığı nəzərə alıb, kəskin qiymət artımı məqsədəuyğun deyil. Əgər dəyişikliklər əsaslı təhlil edilərsə, qiymət artımı gözləniləndir".
AYSEL QULİYEVA

Telegramda izləyin