Məktəbdə telefon problemini necə həll etmək olar?

"Məktəblərdə telefon işlətmək məsələsi nəinki Azərbaycanda xarici ölkələrdə belə müzakirədədir. Burda 2 məsələ var. İlkin məsələ şagird və valideyn əlaqəsinin itməməsidir, ikinci məsələ isə tədrisin keyfiyyətidir. Şagirdin dərs vaxtı fikri yayınır, internetə girir. Bunun orta yolu tapılmalıdır. Müxtəlif ölkə təcrübələri var. Buna əsasən smart olmayan telefonlara icazə verilə bilər. Şagird internetə girmədən valideyn ilə əlaqə saxlaya bilsin. Bəzi ölkələrdə məktəbdə hər şagirdin xüsusi dolabı olur. Hansı ki şagird telefonu dolaba qoyub, dərs bitəndən sonra götürür".

Bunu Sonxeber.az-a təhsil eksperti Elçin Süleymansoy deyib.

O bildirib ki, bəzi ölkələrdə isə telefon dalğasını ləğv edən xüsusi cihazlar siniflərə qoyulur.

"Bu da şagirdlərdən telefon yığılmasına ehtiyac olmadığını göstərir. Həm tədris keyfiyyətinə, həm də şagirdlərin əxlaqının təmzimlənməsinə görə bu ciddi problemdir. Bəzi valideynlər təhlükəsizlik məsələlərinə görə şagirdlə əlaqə üçün telefonun istifadəsini zəruri görürlər. Məktəblərdə bəzən müəllimlər dərs başlayanda telefonları yığıb, dərsdən sonra qaytarırlar. Bu kimi hallar da olur. Dərs keyfiyyətinin aşağı düşməsinə maneə olan bütün cihazlar dərs prosesindən kənarlaşdırılmalıdır. Müəllimlər bəzən bu məsuliyyətin altına girmək istəmirlər. Bunu təşkil etmək çətindir, çünki bəzən telefonlar itə bilər bu da məsuliyyətdir. Telefon məsələsinə valideyn komitəsi, məktəb komitəsi birlikdə qərar verməlidir. Məktəb girişində telefon saxlanılma otaqları yaradıla bilər. Telefonun tədris prosesinə mənfi təsiri şübhəsiz ki var. Çalışmaq lazımdır ki, telefondan faydalı istifadə etməyi şagirdlərə başa salaq".
AYSEL QULİYEVA

Telegramda izləyin