Nigeriyada silahlı hücumlar nəticəsində 3 mülki şəxs ölüb

Nigeriyanın Kaduna əyalətində silahlı hücumlar nəticəsində 3 dinc sakin ölüb.
Sonxeber.az xəbər verir ki, Kaduna Gənclik Koalisiyasının sədri Bawa Emmanuel verdiyi açıqlamada, naməlum silahlı şəxslərin Kaduna əyalətinin Kaura rayonunda iki qonşu kəndə hücumu nəticəsində 3 mülki vətəndaşı öldürdüyünü bildirib.

Rəsmilər bölgəyə təhlükəsizlik qüvvələrinin göndərildiyini və hadisə ilə bağlı araşdırma başladıldığını bildirib.

Kaduna əyalətinin daxili təhlükəsizlik və daxili işlər komissarı Samuel Aruvan verdiyi yazılı açıqlamada ordunun Kaduna əyalətinin Birnin Qvari, İqabi və Çikun rayonlarında silahlı dəstə üzvlərinə qarşı əməliyyat keçirdiyini bildirib.

Aruvan qeyd edib ki, əməliyyatlar zamanı silahlı dəstə üzvləri tərəfindən girov götürülən 5 nəfər xilas edilib.

Nigeriya son zamanlar ölkənin müxtəlif bölgələrində terror təşkilatları Boko Haram və ISWAP, eləcə də silahlı dəstələrin hücumları ilə üzləşib.

Ötən il Kaduna əyalətində silahlı şəxslərin həyata keçirdiyi hücumlarda 937 nəfər həyatını itirib, 1972 nəfər isə qaçırılıb.

Şəbnəm Lətifi

Telegramda izləyin