"Səfirliyimizə edilən hücuma görə məsuliyyət İran hökumətinin üzərinə düşür"- Cavanşir Paşazadə

Xəbər verdiyimiz kimi, Azərbaycanın İrandakı səfirliyinə silahlı hücum edilib. Hücum edən şəxs kalaşnikov markalı avtomat silahla mühafizə postunu yararaq, mühafizə xidmətinin rəisini qətlə yetirib. Səfirliyin iki nəfər mühafizə əməkdaşı da hücumun qarşısını alarkən yaralanıblar. Onların vəziyyəti qənaətbəxşdir. Hazırda bu xain hücum üzrə araşdırma gedir.

Bununla bağlı Sonxeber.az-a danışan deputat Cavanşir Paşazadə bildirib ki, bu gün Tehrandakı səfirliyimizə qarşı törədilmiş terror aktı İranın Azərbaycana növbəti xəyanətidir:

"Səfirliyimizə edilən hücuma görə məsuliyyət birbaşa İran hökumətinin üzərinə düşür. Bilirsiniz ki, diplomatik fəaliyyət Vyana Konvensiyası əsasında tənzimlənir. Bu gün baş verənlər Vyana Konvensiyasının kobud şəkildə pozulmasıdır.

Əslində bu hadisə bizi təəccübləndirmədi. Azərbaycan İrana qarşı dost münasibəti göstərsə də, qonşu ölkədən hər zaman xəyanət görüb. Bu gün səfirliyimizə edilən hücum da İranın Azərbaycana qarşı növbəti xəyanətidir. Bilirsiniz ki, İran Azərbaycan torpaqları işğal altında olduğu 30 il müddətində Ermənistana bütün vasitələrlə dəstək verirdi, hətta Qarabağdakı terrorçu-separatçılarla əməkdaşlıq da edirdi. Artıq 44 günlük Vətən müharibəsindən sonrakı dövrdə molla rejimi bu xain siyasətini gizlətmir, Ermənistanı himayə edir. Əlbəttə ki, səfirliyimizə edilən hücumun arxasında ermənilərin olması da istisna deyil. Ümid edirəm ki, İran hökuməti pisləşməkdə olan münasibətlərin daha da gərginləşməsinə səbəb olmaz və cinayətkarlara layiqli cəzasını verər".

Aysel Yusifqızı

Telegramda izləyin

instagramda izləyin