Paşinyan ərazi bütövlüyünün qarşılıqlı tanınmasını sülh müqaviləsi mətninin yekunlaşdırılması üçün mühüm addım kimi qiymətləndirib

Baş nazir Nikol Paşinyan Ermənistan və Azərbaycan arasında ərazi bütövlüyünün qarşılıqlı tanınmasını regionda sabitliyin və sülhün bərqərar olması və iki ölkə arasında sülh müqaviləsinin mətninin yekunlaşdırılması baxımından mühüm addım kimi qiymətləndirib.

Sonxeber.az xəbər verir ki, Ermənistanın baş naziri mayın 18-də Nazirlər Kabinetinin iclasında Avropa İttifaqı Şurasının prezidenti Şarl Mişelin vasitəçiliyi ilə mayın 14-də Brüsseldə Azərbaycan prezidenti ilə görüşü barədə danışarkən belə deyib.

Paşinyan xatırladıb ki, 2022-ci ilin oktyabrında Fransa prezidenti və Avropa Şurasının sədri ilə Praqa görüşü zamanı Azərbaycan Prezidenti İlham Əliyev və o, BMT Nizamnaməsinə və 1991-ci il Almatı Bəyannaməsinə sadiq olduqlarını bir daha bəyan ediblər və bir-birlərinin ərazilərini tanıdıqlarını vurğulayıblar.
"Biz mayın 14-də daha bir addım atdıq. Avropa İttifaqı Şurasının prezidentinin bəyanatında da qeyd olunduğu kimi, biz qeyd etdik ki, Azərbaycan Ermənistanın 29,9 min kvadratkilometr ərazi bütövlüyünü, Ermənistan isə Azərbaycanın 86,6 min kvadrat kilometr ərazi bütövlüyünü tanıyır. Qeyd etməliyəm ki, mən bunu regionda sabitliyin və sülhün bərqərar olması, həmçinin Ermənistan və Azərbaycan arasında sülh müqaviləsinin mətninin yekunlaşdırılması və sərhədlərin delimitasiyası baxımından mühüm addım hesab edirəm. Lakin təbii ki, növbəti addım delimitasiya üçün hüquqi qüvvəyə və əhəmiyyətə malik konkret əsasların müəyyən edilməsi və razılaşdırılması olmalıdır", - Paşinyan bildirib.

Ermənistanın baş naziri Avropa İttifaqı Şurasının prezidenti Çarlz Mişelin bəyanatında beynəlxalq ictimaiyyətlə əməkdaşlıq çərçivəsində Dağlıq Qarabağ ermənilərinin hüquqları və təhlükəsizliyi ətrafında Bakı-Xankəndi dialoqunun vacibliyini qeyd etməsi faktını vurğulayıb. Paşinyan bildirib ki, bu, Azərbaycanla münasibətlərin real və hərtərəfli normallaşması və regionda davamlı sülhün bərqərar olması üçün əlamətdar prosesdir.

"Buna görə də bu, Ermənistan və Azərbaycan arasında sülh müqaviləsinin imzalanmasını xeyli sürətləndirəcək. Ermənistan-Azərbaycan dəmir yolunun bərpası ilə bağlı Brüsseldə də müəyyən müsbət fikir formalaşıb, lakin əvvəlki təcrübəni nəzərə alaraq, mən bununla bağlı konkret açıqlama verməkdən çəkinəcəyəm. Bunu bir daha vurğulayıram, Ermənistan tərəflərin suverenliyi, yurisdiksiyası, qarşılıqlılığı və bərabərliyi prinsipləri əsasında 9 noyabr 2020-ci il tarixli bəyanatın 9-cu bəndi və 11 yanvar üçtərəfli bəyanatında nəzərdə tutulan əlaqələri mümkün qədər tez bir zamanda açmağa hazırdır", - deyə Paşinyan bildirib. .

O əlavə edib ki, Mişelin bəyanatında həmçinin qeyd olunub ki, hərbi əsirlərin və digər məhbusların gələcəkdə azadlığa buraxılması və itkin düşənlərin taleyinin aydınlaşdırılması ilə bağlı müəyyən anlaşma olub.
"Lakin bunun çox həssas məsələ olduğunu nəzərə alsaq, yalnız onu deyim ki, növbəti görüşlərdə bu mövzuda müzakirələr davam etdiriləcək", - deyə Paşinyan bildirib.

Telegramda izləyin