"Əminliklə deyə bilərik ki, azərbaycanlıların qanını tökən bütün canilər layiq olduqları cəzanı alacaq" - DEPUTAT

"Azərbaycan xalqı tarixin müxtəlif dövrlərində erməni faşizminin vandallığına məruz qalıb. Xüsusilə, Birinci Qarabağ müharibəsi dövründə Azərbaycan xalqına qarşı ermənilər tərəfindən soyqırım, etnik təmizləmələr, müharibə və insanlıq əleyhinə cinayətlərin törədilməsi bütövlükdə bəşəriyyətə qarşı yönələn qəbuledilməz bir davranışdır. Bu baxımdan Vaqif Xaçaturyan kimi bir caninin həbs olunması ədalətin bərpası və beynəlxalq hüququn bərqərar olması baxımından olduqca önəmlidir".

Bu fikirləri Sonxeber.az-a açıqlamasında Milli Məclisin üzvü Tamam Cəfərova deyib.

Deputat qeyd edib ki, azərbaycanlılara qarşı kütləvi qırğın törətmiş şəxslərdən birinin Laçın dövlət sərhəd-buraxılış məntəqəsində həbs olunması ermənilərə və onların havadarlarına açıq mesajdır. Şübhəsiz ki, Qarabağ ərazisində qanunsuz şəkildə məskunlaşan müharibə caniləri çoxdur. Xaçaturyan onlardan sadəcə biridir. Üçtərəfli bəyanatın müvafiq maddəsinə əsasən onlar Qarabağı çoxdan tərk etməli idilər. Təəssüflər olsun ki, bəyanatdan irəli gələn maddələr hələ də yerinə yetirilməyib. Ermənistan hər zaman olduğu kimi indi də, Xaçaturyan kimi caninin həbsi məsələsi ətrafında siyasi manipulyasiya və oyunlara əl atır. Əlbəttə, bütün bu spekulyasiya və oyunlar Ermənsitanın "blokada" şousunun növbəti mərhələsidir".

Deputat bildirib ki, V.Xaçaturyan və onun dəstəsinin Xocalı rayonun Meşəli kəndində etnik zəmində törətdiyi cinayətlər sadəcə azərbaycanlılara qarşı deyil, bütövlükdə insanlıq əlehinə törədilmiş vəhşilikdir:

"Təəssüf ki, 90-cı illərdə erməni vandalları tərəfindən azərbaycanlılara qarşı törədilən qətliam və cinayətlərin heç birinə beynəlxalq hüquqi qiymət verilməyib, cinayətkarlar cəzalandırılmayıb. Xaçaturyan bir qrup erməni hərbi birləşmələrinin tərkibində 1991-ci il dekabrın 22-də Xocalı rayonunun Meşəli kəndində azərbaycanlılara qarşı kütləvi qırğın törədib. Qırğın zamanı, 25 nəfər azərbaycanlı öldürülüb, 14 nəfər yaralanıb, 358 nəfər isə didərgin salınıb. Sözügedən soyqırımı və deportasiya faktları ilə bağlı cinayət işi üzrə Vaqif Çerkezoviç Xaçaturyanın Azərbaycan Respublikası Cinayət Məcəlləsinin 103 (soyqırımı) və 107-ci (əhalini deportasiya etmə və ya məcburi köçürmə) maddələri ilə təqsirləndirilən şəxs qismində məsuliyyətə cəlb olunması barədə qərar qəbul edilib. Xaçaturyanın barəsində 2013-cü ildən beynəlxalq axtarış elan edilmişdi. Bu baxımdan qeyd etməliyik ki, Azərbaycan hökuməti Vaqif Xaçaturyanın istintaqa və gələcəkdə ədalət məhkəməsinin qarşısına çıxarılması istiqamətində müvafiq hüquqi addımlar atmaqla, "Soyqırımı cinayətlərinin qarşısının alınması və cəzalandırılması haqqında" Konvensiyanın tələblərini yerinə yetirir.Konvensiyanın tələblərinin yerinə yetirilməsi 44 günlük Vətən müharibəsində olduğu kimi Azərbaycanın növbəti dəfə beynəlxalq hüququn norma və prinsiplərini təmin etdiyinin göstəricisidir".

Bütün bunların fonunda azərbaycanlılara qarşı cinayət törədənlərin, canilik edənlərin layiq olduğu cəzanı alması ədalətin təmin olunması baxımından olduqca önəmlidir. Ermənistan vandal, cinayətkar, faşist bir dövlətdir və bunun bütün sübutları işğaldan azad olunan ərazilərimizdədir. Şübhəsiz ki, erməni seperatçıları, vandalları törətdikləri bütün cinayətlərə görə cavab verməli olacaqlar. Xaçaturyanın həbs olunması bunun əyani göstəricisidir. Azərbaycanlılara qarşı barbarlıq nümayiş etdirən canilər havadarlarının köməyinə ümid bəsləməməlidirlər. Əminliklə deyə bilərik ki, azərbaycanlıların qanını tökən bütün canilər layiq olduqları cəzanı alacaq".

Telegramda izləyin