Məşhur ədviyyatın qaraciyəri qocalmadan qoruya biləcəyi məlum olub

Zərdəçalın tərkibində olan kurkumin maddəsi qaraciyəri yaşla bağlı dəyişikliklərdən, iltihabdan və zədələnmədən qoruya bilər.

BAKU.WS xəbər verir ki, bu qənaətə "Food & Function" elmi jurnalında dərc olunan araşdırmanın müəllifləri gəliblər.

Tədqiqatçılar bağırsaq, onun mikroflorası və qaraciyər arasındakı əlaqəni araşdırıblar. Məlum olub ki, yaş artdıqca bağırsaq mikroflorasının tərkibi dəyişir, qoruyucu baryer zəifləyir və iltihabi proseslər güclənir. Bu isə qaraciyər hüceyrələrinin zədələnməsi riskini artırır.

Araşdırmaya görə, kurkumin bağırsağın qoruyucu funksiyasını dəstəkləyə, mikrofloranın tərkibinə müsbət təsir göstərə və öd turşularının mübadiləsini tənzimləyə bilər. Həmçinin qaraciyərdə iltihabı və sağlam toxumanın birləşdirici toxuma ilə əvəzlənməsi prosesi olan fibrozu azaltmaq potensialına malikdir.

Bununla belə, alimlər kurkuminin insanlarda effektivliyini təsdiqləmək üçün əlavə klinik tədqiqatların aparılmasının vacibliyini vurğulayıblar.

Telegramda izləyin