"Ölkəmizdə uşaq və gənclərin inkişafına çox həssas yanaşma var"- Ceyhun Məmmədov

İstiqamət: Uşaq və gənclərin fiziki və mənəvi inkişafı

"Ölkəmizdə uşaq və gənclərin inkişafına çox həssas, olduqca önəmli bir yanaşma var".

Bu sözləri Milli Məclisin Elm və Təhsil Komitəsinin üzvü, deputat Ceyhun Məmmədov Sonxeber.az-a bildirib.

O qeyd edib ki, Azərbaycan gəncliyi sağlam böyüyür, Azərbaycanda idmana diqqət kifayət qədər yüksəkdir:

"Azərbaycanda uşaq və gənclərin fiziki və mənəvi inkişafı sahəsinə xüsusi diqqət var. Cənab prezidentin rəhbərliyi ilə bu gün uşaq və gənclərin sağlam ruhda böyüməsi üçün davamlı olaraq müxtəlif addımlar atılır. Olimpiya mərkəzlərinin tikilməsi, bu sahədə çalışan insanların əməyinin qiymətləndirilməsi, uğur qazanmış şəxslərin mükafatlandırılması, eyni zamanda davamlı olaraq cənab prezidentin ölkə vətəndaşlarını bu sahəyə təşviq etməsi onu göstərir ki, ölkəmizdə uşaq və gənclərin inkişafına çox həssas, olduqca önəmli bir yanaşma var. Bunun nəticəsində Azərbaycan gəncliyi sağlam böyüyür, Azərbaycanda idmana diqqət kifayət qədər yüksəkdir".

Deputat uşaqlar üçün maarifləndirici kitabların rus dilində Azərbaycan dilindən daha çox olmasına da münasibətini bildirib:
"Mən bu fikirlə razı deyiləm. Son illər Azərbaycan dilində ədəbiyyatın nəşri bir hərəkata çevrilib. Bu fikri illər öncə söyləyə bilərdik ki, Azərbaycanda belə problem var. Hazırkı dövrdə hər gün Azərbaycan dilində bir neçə kitab nəşr olunur. Bu sahədə bir neçə nəşriyyat fəaliyyət göstərir və onlar davamlı olaraq bizim ədəbiyyatın inkişafı üçün kitab nəşr edirlər. Mən düşünmürəm ki, rus dilli kitablar daha çoxdur. Şəhərin mərkəzində kitab mağazalarına baxsaq, görərik ki, Azərbaycan dilində kitablar kifayət qədər çoxdur".

Material Azərbaycan Respublikasının

Şəbnəm Lətifi

Telegramda izləyin