"Əgər təxribatlar davam edərsə Qarabağda yenidən anti-terror əməliyyatları başlaya bilər" - DEPUTAT

Xəbər verdiyimiz kimi avqustun 16-sı saat 09:00 radələrində Ermənistan silahlı qüvvələrinə məxsus kvadrokopter Azərbaycan Ordusunun Naxçıvan Muxtar Respublikasının Sədərək rayonu istiqamətində yerləşən mövqeləri üzərində kəşfiyyat uçuşları həyata keçirməyə cəhd göstərib.Təxribatın qarşısının alınması məqsədilə bölmələrimiz tərəfindən açılan atəş nəticəsində kvadrokopter Ermənistan istiqamətində geri qayıtmağa məcbur edilib.

Bununla bağlı Sonxeber.az-a danışan deputat İqbal Maəmmədov bildirib ki, Ermənistan təxribatları ilə regionda vəziyyəti gərginləşdirməyə çalışır:

"Təəssüf ki, Ermənistan bu günə qədər 2020-ci ilin 10 noyabrında imzalanan üçtərəfli bəyanatla üzərinə götürdüyü öhdəliyi icra etmir. Üçtərəfli bəyanatın imzalanmasından üç ilə yaxın vaxt keçməsində baxmayaraq hələ qanunsuz silahlı erməni birləşmələri Qarabağdadır və təxribatlarına davam edirlər. Bütün təxribatlar bir daha sübut edir ki, Ermənistan rəhbərliyi düşmənçilik niyyətindən və təxribatçı addımlarından əl çəkmək istəmir. Azərbaycan-Ermənistan dövlət sərhədində erməni terrorçuları növbəti dəfə təxribat törədib. Belə ki, Ermənistan silahlı qüvvələrinə məxsus kvadrokopter Azərbaycan Ordusunun Naxçıvan Muxtar Respublikasının Sədərək rayonu istiqamətində yerləşən mövqeləri üzərində kəşfiyyat uçuşları həyata keçirməyə cəhd göstərib. Ordumuzun peşəkarlığı nəticəsində kvadrokopter Ermənistan istiqamətində geri qayıtmağa məcbur edilib. Ermənistan təxribatları ilə dünyaya hələ də münaqişənin davam etdiyini göstərməyə çalışır. Ordumuz erməni siyasətinə çox yaxşı bələd olduğu üçün hər zaman ayıq-sayıqdır. Ermənistan və onun havadarları bilməlidir ki, artıq Azərbaycan dövlətinin səbri tükənməkdədir".

Deputat vurğulayıb ki, təxribatlar davam edərsə Ermənistana istər güc, istərsə də siyasi diplomatik baxımdan layiqli cavab veriləcək:

"Qaldı ki, Qarabağda anti-terror əməliyyatının yenidən başlanmasına. Əgər təxribatlar davam edərsə Azərbaycan Qarabağda yenidən anti-terror əməliyyatlar başlaya bilər. Yaxşı olar ki, Nikol Paşinyan ölkəsini məhvə aparan təxribatlarına son qoyaraq, Azərbaycanın diqtəsi ilə hazırlanan sülh müqaviləsini imzalasın".

Telegramda izləyin