İlk dərs günlərini xatırladılar

Bu gün Azərbaycanda "Bilik günü"dür.

Axşam.az xəbər verir ki, "Sabahın xeyir, Azərbaycan!" verilişi sənət adamları arasında sorğu apararaq, məktəb xatirələrini soruşublar.

Xalq artisti, müğənni Gülyaz Məmmədova ilk dərs gününü "Şəki rayonu, Böyük Dəhnə kəndinin 1 nömrəli tam orta məktəbində təhsil almışam. 1977-ci ildə dayımın həyat yoldaşı Flora müəllimə bizə gəldi söylədi ki, istəyirəm Gülyaz mənim sinfimdə oxusun. Ən maraqlısı odur ki, o, bütün qohumlarını bir sinfə yığmışdı. Orada dayı, xala, bibi qızları bir sinifdə idi. Ən yaxşı günlərim o idi ki, gəlib bizim səsimizə qulaq asıb Bakıya müsabiqələrə yollayırdılar. Səsimi isə mən beşinci, Gülyanaq isə ikinci sinifdə oxuyanda kəşf etdilər" sözləri ilə xatırlayıb.

Xalq artisti Zemfira Əbdülsəmədova isə açıqlamasında "8-ci kilometr qəsəbəsində 70 nömrəli tam orta məktəbdə oxumuşam. Sonradan isə orta təhsilimi 250 nömrəli tam orta məktəbdə davam etdirdim. Məktəb illərini xatırladıqda, insanın ən birinci yadına saf, təmiz xatirələr düşür. Anamın ütülədiyi ağ köynəyi, göy ətəyi, ağ uzunboğaz corabları və eyni rəngdə ayaqqabılarını geyinib dərsə gedirdim. Məktəbli formamı hər gün anama ütülətdirirdim. O qədər məsuliyyətli idim ki... Hər zaman məktəbə hazır şəkildə getmək istəyirdim" sözlərini söyləyib.

Əməkdar artist Nicat Kazımov isə məktəb vaxtı başına gələn hadisədən söz açıb:

"Hər dəfə məktəb başlamazdan əvvəl mənə çox qəribə həyəcan gəlmişdi. Sevinirdim ki, bir yaş da böyüdüm. Məktəbi bitirmək üçün isə çox təlaşlanırdım. Gözləyirdim ki, axı nə zaman məktəbi bitirəcəyəm və ali məktəbə qəbul olacağam. Ceyranbatan ərazisində yerləşən 8 nömrəli məktəbə getmişəm. İki il orada oxumuşam. Daha sonra isə Sumqayıt Şəhər Hacı Zeynallabdin Tağıyev qəsəbəsində yerləşən 6 nömrəli tam orta məktəbdə təhsil almışam və həmin məktəbi də uğurla bitirmişəm. İlk dərs günüm 1979-cu ildə sentyabrın 1-də olub. Məktəbə getməzdən iki gün əvvəl məni tok vurmuşdu və bu səbəbdən uzun müddət yazı yaza bilmirdim. Barmağımın da bir hissəsi yoxdur".

Telegramda izləyin