"Birlik ölkələri arasında əməkdaşlıq günü-gündən inkişaf edir" - DEPUTAT

"Müstəqil Dövlətlər Birliyi 8 dekabr 1991-ci ildə Minsk şəhərində imzalanmış "Müstəqil Dövlətlər Birliyinin yaradılmasına dair Saziş" əsasında təsis edilmişdir. 24 sentyabr 1993-cü il tarixində MDB dövlət başçıları Şurasının iclasında Azərbaycan Respublikasının MDB-yə daxil olmasına dair qərar qəbul olunmuşdur Azərbaycan Respublikası MDB iştirakçı-dövlətləri ilə əməkdaşlığa xüsusi önəm verir. Azərbaycan MDB-nin işində hər zaman yaxından iştirak etməkdə maraqlı olub. Bununla yanaşı, Azərbaycan Respublikası MDB çərçivəsində siyasi, iqtisadi və humanitar sahələrdə ölkəmiz üçün maraq kəsb edən məsələlər üzrə əməkdaşlığın davam etdirilərək, bu təşkilatın iştirakçı-dövlətlər arasında dialoq müstəvisi kimi saxlanılmasında maraqlıdır". 

Bu fikirləri Sonxeber.az-a açıqlamasında Milli Məclisin üzvü Tamam Cəfərova deyib.

Deputat bildirib ki, Müstəqil Dövlətlər Birliyi Dövlət Başçıları Şurası birlik ölkələri arasında beynəlxalq əməkdaşlığın inkişafına xidmət edən mühüm platformadır:

"Qeyd edək ki, Azərbaycanın birliyə daxil ölkələr arasında Ermənistan istisna olmaqla digər dövlətlərlə dostluq və qarşılıqlı maraqlara hörmət prinsipinə əsaslanan tərəfdaşlıq əlaqələri mövcuddur. Xüsusilə mədəniyyət, humanitar, elm və digər sahələrdə uğurlu əməkdaşlıq həyata keçirilir. Müstəqil Dövlətlər Birliyi (MDB) Dövlət Başçıları Şurasına ev sahibliyi edən Qırğızıstanla Azərbaycan arasında dostluq, qardaşlıq münasibətləri yüksək səviyyədədir. Dövlət başçılarının qarşılıqlı səfərləri zamanı əldə olunmuş razılaşmalar yerinə yetirilir. Azərbaycan Qırğızıstanda investisiya layihələrini həyata keçirməyə başlayıb. Əməkdaşlığı dərinləşdirmək məqsədilə Azərbaycan-Qırğızıstan İnvestisiya Fondu yaradılıb. Qırğızıstan sabit inkişaf edir. Qırğızıstanın son dövrdəki sosial-iqtisadi inkişafı bütün dost ölkələri sevindirir.

Millət vəkili qeyd edib ki, birlik ölkələri arasında humanitar sahə əməkdaşlığın mühüm istiqamətlərindən biridir:

"Azərbaycan bu istiqamətdə əməkdaşlığa böyük töhfə verir. Mühüm məqamlardan biri ondan ibarətdir ki, Azərbaycan 2025-ci ildə növbəti dəfə beynəlxalq tədbirə ev sahibliyi edəcək. Beləki, Azərbaycanın 2025-ci ildə üçüncü MDB Oyunlarının keçirilməsi üzrə namizədliyi dəstəklənib. Bu haqda cənab Prezident İlham Əliyev çıxışı zamanı deyib: "Üçüncü MDB Oyunları idman sahəsində əməkdaşlığımızı möhkəmləndirməklə yanaşı, Birlik məkanında uğurlu qarşılıqlı fəaliyyətimizin daha bir nümayişi olacaq".

Dünyada çətin və mürəkkəb proseslər gedir və günü-gündən yeni gərginlik ocaqları yaranır. Bu baxımdan birlik ölkələrinin dünyada təhdid yaradan məsələlərdə birgə əməkdaşlıq etməsi olduqca mühüm əhəmiyyət kəsb edir. Bu baxımdan birlik ölkələri arasında əməkdaşlıq günü-gündən inkişaf edir"

Telegramda izləyin