Veysəloğlu Şirkətlər Qrupu bu il yerli fermerlərdən 47 milyon manatlıq kənd təsərrüfatı məhsulu alıb

Veysəloğlu Şirkətlər Qrupu (VŞQ) bu ilin 10 ayı ərzində fermerlerdən 45 min tondan artıq, təxminən 47 milyon manat dəyərində kənd təsərrüfatı məhsulu alıb.
Şirkətlər Qrupu bu məhsulları öz satış nöqtələri olan "Araz" və "Oba" market şəbəkələrində təqdim edib.

"Veysəloğlu" hal-hazırda müxətlif regionlar üzrə 170-dən çox fermerlə əməkdaşlıq edir. Fermerlərdən birbaşa alınan məhsullar içərisində soğan, kök, kartof, sarımsaq, şaftalı, gavalı, alma, armud və gilas üstünlük təşkil edir.

Şirkətlər Qrupu bu fəaliyyətini 2021-ci ildən "Tarladan rəfə" konsepti üzrə həyata keçirir. Fermerdən birbaşa satınalma fəaliyyətinə Qrup ilkin mərhələdə Şəki-Zaqatala, Gəncə-Qazax, Aran iqtisadi rayonlarında başlayıb.

2023-cü ildə isə "Şəmkir Aqroparkı"nda Veysəloğlu Şirkətlər Qrupu üçün xüsusi məhsul qəbulu məntəqəsinin yaradılması həmin regiondakı fermerlərin işini asanlaşdırıb.
Bu il ölkənin önəmli istehsal bölgələrində soyuq depoların sayını artırılaraq, Mingəçevir və Salyanla yanaşı, Xaçmaz bölgəsində də saxlama məntəqəsi yaradılıb və pomidor istehsalçıları ilə əldə edilən razılaşmaya əsasən məhsul yığımı həyata keçirilib.

"Fermerdən vasitəsiz alınan məhsulların qiyməti və yerli dad üstünlüyünü istehlakçılar asanlıqla fərqləndirə bilərlər. İstehlakçıları yerli ərzaq məhsulları ilə təmin etmək məqsədi daşıyan bu addımımızla yerli fermerlərin inkişafını da dəstəkləyirik. Şirkətin dayanıqlı inkişaf fəaliyyətlərindən olan bu istiqamət əhalini uyğun qiymətə təbii məhsullarla təmin etməklə yanaşı, ölkənin əkinçilik potensialının tam olaraq üzə çıxarmağa və kiçik və orta təsərrüfat subyektlərinə dəstək olmağa yönəlib" – bunu Veysəloğlu Şirkətlər Qrupunun Biznesə Dəstək üzrə direktoru Anar Cümşüdov bildirib.

"Veysəloğlu" nümayəndəsi əlavə edib ki, qurulmuş "soyuq zəncir" istehsalçıların məhsulunu satmaq üçün vaxt və pul sərf edərək Bakıya gəlməsinə ehtiyac qoymur. Öz məhsullarını "Veysəloğlu" regional depolarına çatdırmaqla, məhsullarının ölkə üzrə "Araz" və "Oba" marketlərində satışına nail olurlar.

Veysəloğlu Şirkətlər Qrupu bu ilin sonunadək əməkdaşlıq etdiyi fermerlərin sayını 200-ə çatdırmağı planlaşdırır. Həmçinin il sonuna qədər təsərrüfat sahiblərindən birbaşa alışların 60 min tona çatdırılması proqnozlaşdırılıb.

Telegramda izləyin