"Qarabağın inkişafını paytaxtın inkişaf səviyyəsinə uyğunlaşdırmaq Milli Prioritetlərimizin vacib elementlərindən biridir"-ŞƏRH

"Möhtərəm Prezidentin Sərəncamı ilə Xankəndi şəhərində Qarabağ Univerisitetinin yaradılması Ermənistanın 30 il davam etmiş işğal və təcavüzdə ehtiva olunan sülh və insanlıq əleyhinə, habelə müharibə cinayətlərinin ardınca bölgədə müasir təhsil və innovasiyaları təşviq edən münbit şəraitin formalaşdırılması baxımdan mühüm tarixi hadisədir".

Bu sözləri Sonxeber.az-a Milli Məclisin deputatı Bəhruz Məhərrəmov deyib.

O bildirib ki, Cənab İlham Əliyev 30 il cinayətkarlıq yuvası olmuş böyük bir ərazidə dünyada artan rəqabətə hazır olan, rəqabətli insan kapitalını formalaşdırmağa yönəli həlledici gedişi ilə həm də bu torpaqların əsl sahibinin kim olduğunu bir daha göstərmiş oldu.
Bildiyimiz kimi, "Azərbaycan 2030: sosial-iqtisadi inkişafa dair" Milli Prioritetlər müəyyənləşdirilərkən cənab İlham Əliyev azad edilmiş ərazilərə əhalinin qayıdışının təmin olunmasını ölkənin yeni inkişaf magistralının ideoloji nüvəsi kimi müəyyən edib. Keçmiş məcburi köçkünlərin Qarabağ və Şərqi Zəngəzura qayıdışı və dayanıqlı məskunlaşması həm də böyük Zəfərimizin əbədiləşdirilməsi üçün də başlıca şərtdir. Bu məqsədlə isə həmin ərazilər dayanıqlı məskunlaşma üçün təhlükəsiz və abad zonaya çevrilməli, müasir prinsiplərə əsaslanan komfortlu yaşayış mühiti yaradılmalıdır.

"Regionların, o cümlədən Qarabağ və Şərqi Zəngəzurun inkişafını paytaxtın inkişaf səviyyəsinə uyğunlaşdırmaq Milli Prioritetlərimizin vacib elementlərindən biridir. Bu isə öz növbəsində işğaldan azad olunmuş ərazilərimizdə hərtərəfli təhlükəsiz və əlverişli həyat şəraiti ilə bərabər, zəruri olan bütün iqtisadi və sosial infrastrukturun yaradılması, regionlarda da insan kapitalının müasirləşdirilməsi, inkişaf üçün yalnız iqtisadi artımda deyil, həm də cəmiyyətin bütün üzvlərinin sosial rifahına fokuslanılmasında ehtiva olunur. Təsadüfi deyil ki, möhtərəm Prezident işğaldan azad edilmiş ərazilərin iqtisadi potensialı, aparılan bərpa-quruculuq işləri, eləcə də əmək bazarının tələblərini regionda yüksəkixtisaslı kadrların hazırlığını həyata keçirən ali təhsil müəssisəsinin təşkili zərurəti ilə əsaslandıraraq "Qarabağ Universitetinin yaradılması haqqında" Sərəncam imzalayıb. Müvafiq Sərəncamda da ifadə olunduğu kimi, ali təhsil müəssisəsinin təsis olunması regionun sosial-iqtisadi ehtiyaclarına uyğun yüksək ixtisaslı kadr tələbatının ödənilməsi və tarixən mövcud olmuş təhsil ənənələrinin yaşadılmasına xidmət edəcək ki, bu da Qarabağ və Şərqi Zəngəzur sakinlərinin məhz təhsil vasitəsilə ölkədə insan kapitalının milli sərvətdə iştirak payının davamlı şəkildə artırılmasında xüsusi rol almalarına səbəb olacaq".

Telegramda izləyin