Gələn ildən etibarən bu evlərin və obyektlərin qiyməti ucuzlaşa bilər - Yeni güzəşt

Vergi Məcəlləsinə edilən dəyişiklik nəticəsində bankların əmlak vergisindən azad edilməsi banklar tərəfindən hərrac vasitəsilə satışa çıxarılan mənzillərin və qeyri-yaşayış obyektlərinin ucuzlaşmasına səbəb ola bilər.

Bunu Milli Məclisin deputatı Vüqar Bayramov deyib.

Deputat qeyd edib ki, dəyişikliyə əsasən, 2024-cü il yanvarın 1-dən etibarən banklar verilmiş kredit müqabilində onların mülkiyyətinə keçən əmlaklara görə həmin əmlakların balanslara götürdüyü təqvim ilindən başlayaraq, iki il müddətində əmlak vergisi ödəməkdən azaddırlar.

"Bəllidir ki, banklar kredit verən zaman girov olaraq əmlakları cəlb edirlər və kredit qaytarıla bilməyəndə həmin əmlaklar bankların balansına keçir. Mövcud qanunvericiliyə görə, banklar həmin əmlaka görə əmlak vergisi ödəyirdilər və həmin əmlakların, o cümlədən, evlərin və qeyri-yaşayış obyektlərinin xərci artırdı. Xərc artdığı üçün, banklar o əmlakları hərraca çıxaran zaman daha yüksək qiymətlə satmaq məcburiyyətində qalırdılar. Çünki həmin vergini xərcə daxil edirdilər və əmlakın qiymətinin üzərinə gəlirdilər.

Ancaq yeni qaydalara əsasən, həmin əmlaklar iki il müddətinə əmlak vergisindən azad ediləcəklər və nəticədə, bu, imkan verəcək ki, bankların hərrac vasitəsilə satdığı əmlakın, evlərin və obyektlərin qiymətləri nisbətən ucuzlaşsın.

Dəyişikliklər həmin əmlakların daha da ucuz təklif edilməsinə və vətəndaşlar tərəfindən alınmasına imkan verəcək. Bu baxımdan, gözlənti ondan ibarətdir ki, gələn ildən etibarən mənzil bazarında hərrac vasitəsilə satılan mənzillərin qiymətində azalmaları müşahidə edə bilərik", - deyə o əlavə edib.

Qeyd edək ki, Milli Məclisin dekabrın 5-də keçirilən iclasında müzakirə edilən Vergi Məcəlləsinə dəyişiklikdə bir sıra güzəştlər öz əksini tapıb. Müzakirələrdən sonra dəyişiklik səsverməyə qoyularaq üçüncü oxunuşda təsdiq edilib.

Telegramda izləyin