"Televiziyalar bayağı hərəkətlər ilə həqiqi informasiyadan çox uzaqlaşıblar" - EKSPERT

Dünyada ənənəvi jurnalistika öz formasını dəyişir. Televiziya kanalları rəqəmsal platformalar qarşısında öz mövqeyini itirdikcə, daha çox əllərində olan başqa variantlardan istifadə edirlər. Son zamanlar bəzi televiziya kanallarında yayımlanan verilişlərdə efir mədəniyyətinə xas olmayan hərəkətləri, bayağılığı nümayiş etdirirlər. Bu kimi hallara verilişlərdə qonaqların üzərində olan geyimlərin qiymətlərinin soruşulması, şou xatirinə edilən davranışlar aiddir. Bu kimi hallar tamaşaçılar tərəfindən birmənalı qarşılanmır. Bunlardan biridə şou-biznesin məşhur cütlüyü müğənnilər Musa Musayev və Təranə Qumral efirdə etdikləri hərəkətləri ilə gündəmə səs salmasıdır. Belə ki, Musa Təranəni qucağına alıb və hündürlüyə qaldırıb. Onun bu hərəkəti isə sosial şəbəkələrdə müzakirə olunub.

Mövzu ilə bağlı, jurnalist-vəkil Ələsgər Məmmədli açıqlama verib. Onun sözlərinə görə, bu mövzu çox şaxəli mövzudur və bir tərəfi yoxdur:

"Məsələ sadəcə efirdə davranış yaxud ifadə və hərəkət deyil. Məsələ televiziyanın mövzu baxımından nə qədər keyfiyyətli kontent təqdim edib-etməməsidir. Ola bilər ki, bir nəfər çox yaxşı kostyum geyinib, yaxşı qalstuk taxır. Amma danışanda yalan danışır, verdiyi məlumatın heç bir əsası yoxdur və propaqanda ilə məşğuldur. Buda efir mədəniyyətsizliyidir. Hərəkətlərinə baxmamaq və bayağı danışmaq, mədəniyyət sərhədlərindən kənara çıxmaq, jarqon ifadələrdən istifadə etməkdə eyni nəticədir".

Ekspert bildirib ki, efir mədəniyyəti dedikdə bəzənmək və gözəl cümlələr işlətmək deyil. Eyni zamanda doğrusunu danışmaq, balanslı olmaq və obyektiv yanaşmadır:

"Azərbaycanda təəssüf ki, birincini daha çox üzərinə gedilir və deyilir ki, efirə yaraşmayan hərəkətlər edilir. Məsələn: şpaqat açılır, ailə təhqir olunur, "dram" yaradılır və s. Amma nədənsə əsas bilavasitə televiziyanın öz funksiyası olan, əslində cəmiyyətə doğruları çatdırmaq olan məsələdən kənar hərəkət edərək gecə gündüz 24 saat propaqanda ilə məşğul olanlar, böhtan atanlar müzakirə predmeti olunmur. Ona görə düşünürəm ki, həqiqətən televiziya cəmiyyətin aynası olmaq istəyirsə, sosial, hüquqi, iqtisadi problemləri efirə daşıya bilməlidir. Cəmiyyətdə olan fərqli siyasi görüşləri efirlərə verilməlidir. Problemlərin həlli ilə bağlı gerçək müstəvi olmalıdır. Problemlərlə bağlı gerçək müstəvi olmalıdır. Əsas məsələ tərəflərə müstəvini yarada bilməlidir. Belə olarsa, televiziyalar həqiqətən itirdikləri reytinqi və imici qaytara bilərlər.

Ələsgər Məmmədli qeyd edib ki, Azərbaycan cəmiyyətində insanlar arasında televiziya informasiya təminatı aspektindən yer tutmur:

"Daha çox sosial media üstün gəlir. Buna görə televiziyalar həqiqi informasiya təminatı funksiyasından çox uzaqlaşıblar. Həm bu bayağı hərəkətlər , həm də qeyr-peşəkar verilişlər bu amillər daxildir. Problemləri aradan qaldırmaq və sosial mediada uduzduğu yeri bərpa etmək üçün peşəkar olmaq lazımdır".

Sevda Səfərova

Telegramda izləyin