"Veb-kameralar quraşdırılarkən onların görüntü almasına mane olan hansısa qurğular götürülməlidir" - Məzahir Pənahov

"Dairə seçki komissiyalarının böyük əksəriyyətinin təchizatları qaydasındadır".

Sonxeber.az xəbər verir ki, bunu Mərkəzi Seçki Komissiyasının (MSK) bu gün keçirilən iclasında MSK sədri Məzahir Pənahov deyib.

O qeyd edib ki, yeni yaradılan dairə və məntəqələrin də təchizatlarının tam təmin edilməsi üçün tapşırıq verilib:

"Onların bəzilərində həll edilməli xırda məsələlər var idi. Ümumilikdə vəziyyət yaxşıdır. Seçki məntəqələrinin də 90 faizində vəziyyət normaldır. Amma biz yeni məntəqələr də yaratmışıq, onların tam təchizatına da xüsusi diqqət yetirilir".

MSK sədri seçki məntəqələrinin veb-kameralarla təchizatından da danışıb:

"Veb-kameralar quraşdırılarkən onların görüntü almasına mane olan hansısa qurğular götürülməlidir. Məsələn, bilirik ki, bəzi orta məktəblərin özünün təhlükəsizlik kameraları var. Bu kimi qurğular seçki prosesinin izlənməsi üçün quraşdırılan veb-kameralara mane olursa, seçki bitənə qədər onların çıxarılması məqsədəuyğundur. Təbii ki, seçki prosesi yekunlaşdıqda məntəqələr mütləq əvvəlki vəziyyətinə qaytarılacaq, çıxarılan qurğular yerinə qoyulacaq".

Gülcahan Məmmədova

Telegramda izləyin