"Suni şəkildə qiymətləri qaldıran işbazlarla bağlı nəzarət gücləndirilməlidir" - DEPUTAT

Son dövrlər marketlərdə olan bahalaşmalar vətəndaşların haqlı narazılığına səbəb olur. Hətta, bazarlarda və marketlərdə qiymətlərin dövlət tərəfindən tənzimlənməsini də təklif edənlər də var.

Bununla bağlı Sonxeber.az-a danışan deputat İqbal Məmmədov bildirib ki, suni şəkildə qiymətləri qaldıran işbazlarla bağlı nəzarət gücləndirilməlidir:

"Mətbuatda ətin və digər məhsulların qiymətinin bahalaşması ilə bağlı xəbərlər verilməkdədir. Düşünürəm ki, bazarlarda qiymətlərə nəzarət gücləndirilməlidir. Çünki suni şəkildə qiymətləri qaldırılması birbaşa insanların cibinə girmək və talamaqdır. Bəzi işbazların bu özbaşınalığının qarşısı mütləq alınmalıdır".

Deputat vurğulayıb ki, səlahiyyətli qurumlar bahalaşma ilə bağlı bazarlarda və marketlərdə monitorinq aparmalıdır:

"Suni şəkildə qiymətləri qaldıranları qanunla cəzalandırmalıdır. Dövlət tərəfindən insanlarımızın sosial durumunun yaxşılaşdırılması istiqamətində lazım olan bütün addımlar atılmaqdadır. Bu istiqamətdə cənab prezident İlham Əliyevin müvafiq fərman və sərəncamları da var. Həmin fərman və sərəncamlara uyğun olaraq hər il ölkəmizdə minimum əmək haqqı, pensiyalar və təqaüdlər artırılır. Təəssüf ki, bəzi işbazlar da bunu fürsət bilib qiymətləri qaldırırlar. Bu yolverilməzdir. Hesab edirəm ki, bazarlarda və marketlərdə qiymətlərə nəzarət gücləndirilməlidir. Vətəndaşların ciblərinə əl uzadan işbazların cəzalandırılmasına nail olmaq və istehsalçıların bazarlara birbaşa məhsul çıxarmasına şərait yaratmaq lazımdır".

Telegramda izləyin