Vergidən yayınan "Tiktoker"ləri hansı cəza gözləyir? - AÇIQLAMA

Sosial şəbəkələr artıq gündəlik həyatımızın ayrılmaz hissəsinə çevrilib və fenomenlər bu platformalarda külli-miqdarda gəlir əldə edirlər. Artan izləyici sayı və geridönüşlər üçün məşhur brendlər artıq reklam büdcələrini sosial şəbəkə fenomenlərinə yönəldirlər. Xüsusilə "Instagram" və "TikTok"da reklam verən brendlər fenomenlərin gəlirlərinin böyüməsinə rəhbərlik edir. Azərbaycanda da "TikTok" kimi sosial media platformalarına və fenomenlərə qarşı münasibət birmənalı deyil. Burada maraqlı bir məqam var. Azərbaycanda sosial şəbəkələr üzərindən pul qazanan fenomenlər üzərində dövlət nəzarəti varmı? Sözügedən şəxslər dövlətə vergi ödəyir?

Məsələ ilə bağlı vergi hüququ üzrə ekspert, Vəkillər Kollegiyasının üzvü Sirac Piriyev Sonxeber.az-a açıqlama verib:

"Sosial şəbəkələrdən pul qazanan şəxslər müəyyən qədər vergi verirlər. Amma bu məsələnin tam olaraq qanuni şəkildə tənzimlənməsi və nəzarət mexanizmi yoxdur. Vergi orqanı görə bilmir ki, şəxs buradan nə qədər qazanc əldə edir. Kim istəyirsə ödəyir, eləsi də var ki, ödəmir. Eyni zamanda qanunla tənzimlənməsi də konkret deyil. Yəni ki, hansı formada olmalıdır, burada hansı vergi öhdəlikləri nəzərdə tutulur bəlli deyil. Sadələşmiş yaxud gəlir vergisi ödəmələri ilə bağlı tənzimləmələr yoxdur. Bu baxımdan məsələ sual altındadır. Yəqinki növbəti dəyişikliklər zamanı nəzarət təmin ediləcək. Çünki artıq mövzu ölkə miqyasında aktuallaşıb. Əvvəl bu sahə diqqətdən kənarda qalırdı. İndi nə qədərki aktuallaşır, bu sahəyə də diqqət ayıracaqlar. Dövlət özü təşəbbüs göstərəcək. Bu il olmadı. Amma növbəti ildə çox güman ki, dəyişikliklər olacaq. Hazırda bu sahənin vergi məsələləri qeyri-müəyyəndir".

Sevda Səfərova

Telegramda izləyin