Erkən yaşda hamiləlik hansı fəsadlara səbəb olur? - AÇIQLAMA

Cəmiyyətimizin ən vacib problemlərindən biri də erkən nikahlardır. Son günlər ictimaiyyətdə marağa səbəb olan bu hallar artıq gündəmə çevrilib. Aparıcı mütəxəssislər artıq artan erkən nikahlar ilə bağlı xəbərdarlıq edirlər. Cəmiyyətdə bəzən erkən nikahlar nailiyyət olaraq başa düşülür. Erkən nikahlar digər tərəfdən ciddi sağlamlıq problemi yaradır. BU baxımdan erkən hamiləlik ana və yeni doğulacaq körpə üçün risk faktorları yaradır. Bəs erkən yaşda hamiləlik orqanizmdə hansı fəsadlar yaradır?

Məsələ ilə bağlı ginekoloq Rəşad Sultan Sonxeber.az-a açıqlama verib:

"20 yaş altı olan hamiləlikləri biz erkən yaşda hamiləlik olaraq qeyd edirik. Daha doğrusu riskli hamiləlik olaraq adlandırırıq. Bu nə deməkdir? Hamiləlik təbii haldır. 80-90 faiz hallarda ağırlaşma olmadan doğuşla nəticələnir. Sağlam ana və övladı həyatına davam edir. 10-20 faiz hamiləliklərdə hamiləliyə xas yaxud başqa səbəblərdən problemlər meydana çıxır. Ona görə də riskli hamiləlik anlayışı var. Riski yaradan amillərdən biridə yaşdır. İrəli yaşda 35 yaş üstü hamiləliklər ana və uşaq üçün risk təşkil etdiyi kimi, 20 yaş altı hamiləliklərdə risk təşkil edir. Bütün hamiləlik patologiyaların nəticəsi erkən doğuşa gətirib çıxarır. Bu yaş altı hamiləliklərdə erkən doğuş riski üç dəfə artır. Erkən doğuş nə deməkdir? Vaxtından qabaq doğulmuş körpələrin ölüm və şikəstlik riski yüksəkdir".

Rəşad Sultan bildirib ki, bütün dünyada, cəmiyyətlərin, dövlətlərin səhiyyə təşkilinin göstəricisi kimi ana və yeni doğulmuş körpənin ölümü götürülürsə, bu məsələnin nə dərəcə də önəmli olduğunu təsəvvür edə bilərik:

"Uşaq ölümünün də bir nömrəli səbəbi vaxtından qabaq doğuşdur. Erkən nikahlara, erkən hamiləliklərə səbəbiyyət verməklə, eyni zamanda vaxtından qabaq doğuşlara səbəb oluruq. Vaxtından əvvəl doğuşlara səbəb olmaqla yeni doğulmuş ölüm göstəricisini artırmış oluruq. Beləliklə biz özümüz göstəririk ki, bizim səhiyyəmizin vəziyyəti pisdir. Ona görə də erkən nikahların və erkən hamiləliklərin qarşısını almaqla ölüm və şikəstlik göstəricilərinin sayını azaltmış olarıq. Bununla yanaşı, səhiyyə göstəricilərimizi artırmış olarıq".

Sevda Səfərova

Telegramda izləyin