Dövlət Xidməti ilə "Azərpambıq" arasında məhkəmə çəkişməsi - Nə baş verib?

Dövlət Əmək Müfəttişliyi Xidməti ilə "Azərpambıq Aqrar Sənaye Kompleksi" MMC arasında qalmaqal yaranıb.

Qaynarinfo xəbər verir ki, Xidmət MMC-ni İnzibati Xətalar Məcəlləsinin 192.6-ci maddəsi ilə cərimələyib.

Bu maddə işçinin əmək müqaviləsinə əmək qanunvericiliyinin tələbləri pozularaq xitam verilməsi ilə bağlıdır.

Maddədə inzibati xəta növü kimi vəzifəli şəxslərin 1500 manatdan 2000 manatadək məbləğdə cərimə edilməsi nəzərdə tutulur.

"Azərpambıq Aqrar Sənaye Kompleksi" MMC qərardan narazı qalaraq məhkəməyə müraciət edib. Şirkətin şikayətinə Yasamal Rayon Məhkəməsində baxılacaq. İş hakim Rauf Daşdəmirovun icraatındadır.

Dövlət Əmək Müfəttişliyi Xidməti Əmək və Əhalinin Sosial Müdafiəsi Nazirliyinə tabeli qurumdur. Xidmətin rəisi Vəli Quliyevdir. O, 2022-ci ildən bu vəzifədədir.

"Azərpambıq Aqrar Sənaye Kompleksi" MMC "Azərbaycan Sənaye Korporasiya" ASC-nin tərkibində fəaliyyət göstərir. "Azərpambıq Aqrar Sənaye Komleksi" MMC-nin rayonlarda 14 müəssisəsi var: Bunlar aşağıdakılardır:

Ağcabədi Pambıq İstehsalı və Emalı Zavodu (əkin sahəsi - 4200 ha)
Ətraflı
Beyləqan Pambıq İstehsalı və Emalı Zavodu (əkin sahəsi - 3200 ha)
Bərdə Pambıq İstehsalı və Emalı Zavodu (əkin sahəsi - 3640 ha)
Biləsuvar Pambıq İstehsalı və Emalı Zavodu (əkin sahəsi - 1750 ha)
Saatlı Pambıq İstehsalı və Emalı Zavodu (əkin sahəsi - 2600 ha)
Şirvan Pambıq Emalı Zavodu
Ucar Pambıq Emalı Zavodu
Ağdam Pambıq İstehsalı və Tədarük Məntəqəsi (əkin sahəsi - 540 ha)
Goranboy Pambıq İstehsalı və Tədarük Məntəqəsi (əkin sahəsi - 900 ha)
İmişli Pambıq İstehsalı və Tədarük Məntəqəsi (əkin sahəsi - 1800 ha)
Sabirabad Pambıq İstehsalı və Tədarük Məntəqəsi (əkin sahəsi - 3090 ha)
Salyan Pambıq İstehsalı və Tədarük Məntəqəsi (əkin sahəsi - 1350 ha)
Tərtər Pambıq İstehsalı və Tədarük Məntəqəsi (əkin sahəsi - 1650 ha)
Biləsuvar Təcrübə Sınaq Təsərrüfatı (əkin sahəsi - 800 ha)
MMC-nin direktoru Fəxri Mehdiyevdir. O, bu vəzifəyə 2021-ci ildə təyin edilib.

Telegramda izləyin