Ağır dərs çantaları uşaqların sağlamlığını TƏHDİD EDİR - AÇIQLAMA

Məktəblilərin hər gün ağır dərs çantaları daşıması şagirdlərin sağlamlığı, dərs yükünün düzgün bölüşdürülməsi və dərsliklərin təşkili ilə bağlı məsələləri gündəmə gətirir. Çantaların çəkisinin uşaqların yaşına və fiziki imkanlarına uyğun olmaması onların gündəlik hərəkətinə və sağlamlığına mənfi təsir göstərə bilər. Bu baxımdan, dərsliklərin sayının və çəkisinin azaldılması, elektron resurslardan istifadə, eləcə də məktəblərdə əlavə kitabların saxlanılması kimi alternativlərin tətbiqi müzakirə olunur.

Bəs, məktəblilərin ağır çantalar daşımasının qarşısını almaq üçün təhsil sistemində hansı dəyişikliklərə ehtiyac var? Dərsliklərin çəkisinin azaldılması, elektron dərsliklərə keçid və məktəblərdə kitabların saxlanılması şagirdlərin sağlamlığının qorunmasına nə dərəcədə kömək edə bilər və bu istiqamətdə hansı konkret addımlar atılmalıdır?
Mövzu ilə bağlı Sonxeber.az-a açıqlama verən təhsil eksperti Məzahir Məmmədli bildirib ki, məktəbli çantalarının ağırlığı təkcə Azərbaycanda deyil, inkişaf etmiş ölkələrdə də problem yaradır.

"Hər bir ölkə bu məsələnin həlli üçün özünəməxsus yollar tətbiq edir. Azərbaycanda da elektron dərsliklərdən istifadə olunur. Xüsusilə ibtidai siniflərdə ağır dərsliklərin daşınması problemini məktəblərin özləri də həll edə bilərlər. Məsələn, dərsliklərin məktəbdə saxlanılması, şagirdlərin isə zəruri tapşırıqları evdə yerinə yetirməsi təmin oluna bilər. Bu halda uşaqlar hər gün ağır kitabları özləri ilə daşımaq məcburiyyətində qalmazlar. Digər tərəfdən, valideynlər də bəzən uşaqların çantalarına əlavə ləvazimatlar, su qabları və idman geyimləri qoyurlar ki, bu da çantanın ağırlığını artırır. Problemin aradan qaldırılması üçün məktəblərdə, xüsusilə ibtidai siniflərdə şagirdlərə aid şkafların yaradılması vacibdir. Uşaqlar gündəlik istifadə etdikləri zəruri ləvazimatları həmin şkaflarda saxlaya, evə yalnız lazım olan əşyaları apara bilərlər".

Ekspert bildirib ki, Ümumdünya Səhiyyə Təşkilatının tövsiyələrinə əsasən, məktəbli çantasının ağırlığı uşağın bədən çəkisinin 10 faizindən çox olmamalıdır:

"Məsələn, çəkisi 40 kiloqram olan şagirdin çantası maksimum 4 kiloqram olmalıdır. Bu baxımdan elektron dərsliklərdən istifadənin genişləndirilməsi həm vacib, həm də faydalıdır".

Röyalə Xəyal

Telegramda izləyin