"Naxçıvana nəqliyyat dəhlizi hərbi əməliyyatlar vasitəsilə açılacaq" - AÇIQLAMA

Xəbər verdiyimiz kimi, Rusiyanın Azərbaycandakı səfiri Mixail Yevdokimov "İzvestiya" qəzetinə müsahibə verib. Səfir müsahibəsində deyib ki, Ermənistan Azərbaycanın əsas ərazisi ilə Naxçıvan arasında nəqliyyat dəhlizinin yaradılması ilə bağlı danışıqları uzadır. Bəs Naxçıvan arasında nəqliyyat dəhlizi nə vaxt açılacaq?

Məsələ ilə bağlı siyasi şərhçi Səxavət Məmməd Sonxeber.az-a deyib ki, ümumiyyətlə Ermənistan yaxud Qarabağ münaqişəsinin tarixinə baxanda görürük ki, 30 ilə yaxın müddətdə belə Ermənistan danışıqları uzadır və problemlər yaradırdı:

"Bu sanki Ermənistan siyasətinin əsas prioritetlərindən biri sayılır. Rusiyalı vəzifəli şəxsin dediklərindən asılı olmayaraq, biz bunu özümüzdə görürük ki, bu məsələni uzadır və özünə vaxt qazanmağa çalışır. Vaxt nəticəsində tərəfdar toplamağa çalışır ki, hansısa addımlar atsınlar. Biz burada indi əsas məsələyə diqqət yetirməliyik. Qarabağ ilə bağlı biz 10 noyabr bəyanatına baxanda demək olar ki, bütün məsələlər həll olunub. Azərbaycan tərəfi güc vasitəsilə 10 noyabr bəyanatının Azərbaycan ilə bağlı olan tərəfini tamamilə həll edib. Yalnız Naxçıvana birləşdiriləcək yol məsələsidir. Burada söhbət beynəlxalq kommunikasiya məsələsidir və təkcə Naxçıvana birləşdiriləcək yol nəzərdə tutulmur. Bu yol məsələsi təkcə Azərbaycanın problemi deyil. Nəzərə alsaq ki, yol açılacaq və Rusiyada bu məsələnin içərisində olacaq. 10 noyabr bəyanatında açıq yazılıb ki, həmin yola Rusiyanın Federal Təhlükəsizlik Xidməti nəzarət edəcək. Ermənistan bunu da yubadır".

Səxavət Məmməd bildirib ki, Ermənistan bunun baş tutmaması üçün yanına Fransa Amerikanı ala bilir. Bu prosesdə Ermənistan İran məsələsini də ortalığa atıb. İran hər dəfə bildirir ki, sərhədlərin dəyişdirilməsi məsələsi onların "qırmızı xətti"dir:

"Yəni dolayısıyla hərbi tərəfdən hansısa bir addım atılacaqsa, İran və Fransa buna qarşı çıxacaq. Digər tərəfdən danışıqlara gəlmirlər və qaçırlar. Düşünürəm ki, məsələ bir qədər çətindir və problemlər yaradacaq. Ermənistan və Azərbaycan arasında yenidən müharibə başlayacağı ilə bağlı fikirlər səsləndirilir. Yəni müharibə olması ehtimalı yüksək göstərilir. Bu olsa da, həmin dəhlizin açılması məsələsi olacaq. Bu istiqamətdə hərəkətlilik ola bilər. Bunu təbii ki, Ermənistan özünü hər nə qədər kənara çəksə də, guya onlar müharibə etmək istəmədiklərini bildirsə də, biz görürük ki, hərəkətlilik nəsə onlar tərəfdən gəlir. Bir məsələyə diqqət ayırmaq istəyirəm. Bu nə qədər real olacaq onu da deyə bilmərik. Bu münaqişənin tarixinə baxanda bir məqamın şahidi oluruq. Danışıqlar yolu ilə heç bir şey əldə olunmayıb. Ən çox söhbət danışıqlar zamanı sülh prosesindən gedib. Ən son nöqtədə hərbi əməliyyatlara keçilib".

Ekspertin sözlərinə görə, 10 noyabr bəyanatının Azərbaycana düşən hissəsini Azərbaycan özü antiterror əməliyyatları həll etdi:

"Naxçıvana açılacaq yolda böyük dövlətlər, beynəlxalq qurumlar bu məsələdə bir neçə milyard vəsait ayırıb. Hətta bildirilir ki, bu məsələyə 300 milyard vəsait ayrılacaq. Yəni bu Azərbaycanı aşacaq bir məsələdir. Ola bilsin ki, Ermənistan tərəfində hakimiyyət dəyişikliyi baş verərsə, revanşistlər hakimiyyətə gəlrəsə, onlar Azərbaycana qarşı hansısa addımlar atmağa cəhd göstərə bilərlər. Başqa bir ehtimal olaraq isə, hansısa bir ölkə bu məsələni daha fərqli yönə çəkməyə çalışa bilər. Rusiyanın özü də bu addımı ata bilər. Mən sözügedən yolun danışıqlar ilə açıqlacağını nədənsə görmürəm. Hesab edirəm ki, o yol hərbi əməliyyatlar vasitəsilə açılacaq. Hər halda dünyada gedən proseslər onu göstərir ki, dünya böyük bir müharibəyə gedir. Bizim regionumuzda bundan kənarda qalmayacaq".

Sevda Səfərova

Telegramda izləyin