Erməni təxribatında yaralanan əsgər: "Ordumuz hər zaman öz hərbçisinin qisasını alıb" - YENİLƏNİB + FOTO/VİDEO

"Hazırda özümü yaxşı hiss edirəm, sağalmağa çalışıram".

Bunu Oxu.Az-a açıqlamasında ötən gün şərti dövlət sərhədinin Zəngilan istiqamətində Ermənistanın təxribatı nəticəsində yaralanan hərbi qulluqçu, 2001-ci il təvəllüdlü Pərviz Xəlilzadə deyib.

O bildirib ki, 8 aydır həqiqi hərbi xidmətdədir:

"Eşitdiyimə görə, qarşımızda olan və mənə atəş açılan post darmadağın edilib. Bu, çox qürurvericidir. Azərbaycan Ordusu hər zaman öz hərbi qulluqçusunun yanında olub və olacaq. Ordumuz hər zaman öz hərbi qulluqçularının qisasını alıb və bu belə də olacaqdır".

Qeyd edək ki, P.Xəlilzadə Lənkəran Dövlət Universitetinin Tarix-coğrafiya müəllimliyi ixtisasının 2023-cü il məzunudur.
***

"Xəstə axşam saatlarında güllə yarası ilə daxil olmuşdu. Vəziyyəti nəzərə alınaraq cərrahi əməliyyata alınıb".

Oxu.Az xəbər verir ki, bu barədə Neyrocərrahiyyə Xəstəxanasının spinal cərrahiyyə şöbəsinin müdiri Rasim Quliyev açıqlama verib.

O bildirib ki, Dövlət Sərhəd Xidmətinin "N" saylı hərbi hissəsinin hərbi qulluqçusu boyun hissəsinin ön yan səthindən girmiş güllə yarası ilə daxil olub:

"Güllə onurğa kanalının içərisində qalmışdı. Təxirəsalınmaz əməliyyata götürüldü. Əməliyyat uzun çəkdi, lakin əlavə toxumalar zədələnmədən güllə onurğa kanalından xaric olunub. Dünən xəstəxanaya daxil olarkən onun vəziyyət ağır olaraq qiymətləndirilmişdi, lakin bu gün xəstənin vəziyyəti ötən gün ilə müqayisə xeyli yaxşıdır".

***
Fevralın 12-də saat 13:37-də Azərbaycan-Ermənistan şərti dövlət sərhədinin Zəngilan rayonu ərazisindən keçən hissəsində Ermənistan Silahlı Qüvvələrinin Qafan rayonunun Nerkin-And yaşayış məntəqəsi istiqamətində yerləşən mövqeyindən Dövlət Sərhəd Xidmətinin Sərhəd Qoşunlarının Zəngilan rayonunun Kolluqışlaq kəndi ərazisində yerləşən mövqeyinə açılan atəş nəticəsində boyun nahiyəsindən yaralanan hərbi qulluqçumuz əməliyyat olunub.

Oxu.Az-ın əldə etdiyi məlumata görə, Dövlət Sərhəd Xidmətinin "N" saylı hərbi hissəsinin hərbi qulluqçusu, əsgər Pərviz Ağakişi oğlu Xəlilzadə ixtisaslaşmış tibb müəssisələrindən birində zərruri cərrahi əməliyyat keçirib. Həkim nəzarətində müalicəsini davam etdirir. Vəziyyətinin yaxşı olduğu bildirilib.

Qeyd edək ki, Hərbi Prokurorluğun Mətbuat Xidmətinin yaydığı məlumata əsasən, daxil olmuş məlumat əsasında Qubadlı Hərbi Prokurorluğunun işçiləri tərəfindən izahatlar alınıb, Hərbi Prokurorluğun Kriminalistika və İnformasiya Texnologiyaları idarəsinin əməkdaşları ilə birlikdə müvafiq zəruri tədbirlər görülüb, hadisə yerinə baxış keçirilib və digər hərəkətlər icra edilib.
Fakt üzrə Qubadlı Hərbi Prokurorluğunda Azərbaycan Respublikası Cinayət Məcəlləsinin 29,120.2.12-ci (milli, irqi, dini ədavət və ya düşmənçilik niyyəti ilə qəsdən adam öldürməyə cəhd) maddəsi ilə cinayət işi başlanılaraq şahidlər dindirilib, müvafiq ekspertizalar təyin edilərək, icraya yönəldilib və təxirəsalınmaz zəruri istintaq hərəkətləri həyata keçirilib. İstintaq davam etdirilir, qanunvericiliyin və beynəlxalq hüququn hamılıqla qəbul edilmiş norma və prinsiplərinin tələblərinə uyğun olaraq bütün tədbirlərin görülməsi təmin olunacaq.

Telegramda izləyin