Azərbaycanda hansı ərazilərə qəsəbə statusu verilə bilər? - AÇIQLAMA

Xəbər verdiyimiz kimi, Abşerondakı yeni yaşayış məntəqəsinə qəsəbə statusu verilir. Bu barədə məlumat "Abşeron rayonunun inzibati ərazi bölgüsündə qismən dəyişiklik edilməsi haqqında" qanun layihəsində əksini tapıb. Bəs Azərbaycanda hansı ərazilərə qəsəbə statusu verilə bilər?

Mövzu barədə danışan əmlak məsələləri üzrə ekspert Ramil Osmanlı Sonxeber.az-a bildirib ki, Qəsəbə inzibati ərazi vahidi kimi kənddən daha çox inkişaf etmiş, səhərdən nisbətən geridə qalan yaşayış zonalarına verilə bilər:

"Əhalisinin sayı 10 min olarsa, ərazidə klinika, çoxmənzilli bina məktəb və digər sosial infrastrukturlar olan ərazilərə qəsəbə statusu verilir. Eyni zamanda müxtəlif istiqamətlər üzrə əmək tutumlu məşğuliyyət mövcuddursa həmin ərazilərə qəsəbə statusunun verilməsi mümkündür. O ərazilər inkişaf etdikcə şəhər tipli qəsəbələrə çevrilir. Sonradan isə əhali sayından və inkişafından asılı olaraq şəhər statusu verilə bilər. Bakıda qəsəbə statusu verilə biləcək ərazilər var".

Ekspertin sözlərinə görə, bu gün həmin ərazilərdə çıxarışı olmayan xeyli sayda sənədsiz binalar yaşayan insanlar var. Nəzərə alaq ki, həmin şəxslərində qeydiyyatı yoxdur. Eyni zamanda qanunsuz tikililər var. Bu baxımdan həmin binaların və sakinlərin qeydiyyata alınmaması məsələsi var:

"Məsələn deyək ki, ərazidə 20 min nəfər yaşayır. Həmin ərazidə 15 min nəfər qeydiyyatsız yaşayır. Orada olan binalar əsasən sənədsiz tikililərdir. Hesab edirəm ki, kənd, qəsəbə, şəhər statusu vermək üçün həmin ərazilərin sosial infrastrukturuna baxılmalıdır. Eyni zamanda artıq ərazilərdə özbaşına tikililərin sənədləşdirilməsinə start verilməlidir. Elə ərazilər var ki, onlarin kənd kimi saxlanılması düzgün deyil. Çünki onlar kifayət qədər paytaxta yaxın yerləşirlər. Eyni zamanda sözügedən ərazilərdə iş yerləri mövcuddur. Bu baxımdan imkanlar var amma onları istəyə çevirmək lazımdır. Ərazilərə investisiya qoyulmalı və yollar düzəldilməlidir".

Qeyd edək ki, Abşeron rayonunun inzibati ərazisində salınmış "Şəfəq" adlı yeni yaşayış məntəqəsinə qəsəbə statusu verilir. Qanun layihəsi parlamentin Regional məsələlər komitəsinin bugünkü iclasında müzakirə olunacaq.

Sevda Səfərova

Telegramda izləyin