"Baş verən mina hadisələri sübut edir ki, Ermənistan heç vaxt üzərinə götürdüyü öhdəlikləri yerinə yetirməyəcək" - DEPUTAT

Martın 3-də Ağdam rayonunun Əhmədağalı kəndi ərazisində mina partlayışı baş verib. Mina partlayışı nəticəsində 1995-ci il təvəllüdlü Ağdam rayon sakini Abbasov Bəxtiyar Yaqub oğlu keçmiş təmas xəttində, minalardan təmizlənməmiş ərazidə heyvan otararkən piyada əleyhinə mina partlayışı nətisində hər iki ayağından xəsarət alıb.

Bununla bağlı Sonxeber.az-a danışan deputat İqbal Məmmədov bildirib ki, Ermənistanın Azərbaycana qarşı həyata keçirdiyi mina terroru davam edir.

"2020-ci ildə Üçtərəfli Bəyanatın imzalandığı gündən bu günə qədər yüzlərlə insan mina terroru nəticəsində həlak olub və müxtəlif dərəcəli xəsarət alıb. Ermənistan 30 ilə yaxın işğal altında saxladığı Azərbaycan torpaqlarında əsl barbarlıq və vandalizm törədib. Ermənilərin xalqımıza qarşı törətdiyi hərbi cinayətlərinin sayı-hesabı yoxdur. Bu cinayətlər sırasında ərazilərin minalanması da əsas yerlərdən birini tutur. Baş verən hadisələr erməni terrorizminin yeni formasıdır.44 günlük Vətən müharibəsində torpaqlarımız işğaldan azad olunsa da, dağıntılar və minaların basdırılması soydaşlarımızın evlərinə təhlükəsiz şəkildə qayıtmasına çox böyük əngəldir. Hər dəfə Ermənistan ölkəmizə minalanmış ərazilərin qeyri-dəqiq xəritəsini verib. Məqsəd də vətəndaşlarımızın öz ev evlərinə geri qayıtmasına əngəl olmaqdır. Baş verən mina hadisələri bir daha sübut edir ki, Ermənistan üzərinə götürdüyü öhdəlikləri yerinə yetirmək niyyətində deyil. Terror və təxribat yolu ilə regionda vəziyyəti yenidən gərginləşdirməyə çalışır".

Deputat vurğulayıb ki, Azərbaycan hər zaman sülhün və barışığın tərəfində olub:

"Təəssüf ki, bu sözləri Ermənistana aid etmək olmaz. Azərbaycan dəfələrləsülh əlini uzatsa da Ermənistan məkrli niyyətindən əl çəkmək istəmir. Mülki vətəndaşlara qarşı yönəlmiş mina terroru və sərhəddə törətdiyi təxribatlar bunun bariz nümunəsidir".

Telegramda izləyin