Xankəndidə ikinci parlament binası TİKİLİR? - ARAŞDIRMA

Xəbər verdıyımız kimi, Xankəndidə separatçıların "parlament" binası sökülür. Bununla bağlı görüntülər sosial şəbəkələrdə yayılıb. Burada maraqlı bir sual yaranır. Xankəndidə ikinci bir parlament binası tikilə bilər?

Mövzu ilə bağlı Sonxeber.az-a danışan Milli Məclisin deputatı Razi Nurullayev deyib kİ, Xankəndidə ikinci parlament binasının tikilməsi məsələsi gündəmdə deyil:
"Xankəndidə parlament binasının tikilməsi nə hökumətin gündəliyində var, nə də parlament var. O cümlədən bu mövzu cəmiyyətimizdə belə yoxdur. Ayrı-ayrılıqda Xankəndidə iclasların keçirilməsinə ciddi ehtiyac görmürəm. Şuşada və digər işğaldan azad olunmuş ərazilərdə iclas keçirirdik. Çünki dünyaya Qarabağın Azərbaycana aid olduğunu bir daha göstərmək istəyirdik. Amma artıq Azərbaycan öz suverenliyini bərpa edib. Bu baxımdan Xankəndi, Şuşa və digər işğaldan azad olunmuş ərazilərdə iclasların keçirilməsi yaxud yeni parlament binasının tikilməsi məsələsi gündəmdə olan məsələ deyil".

Deputat Aydın Mirzəzadənin sözlərinə görə, işğaldan azad olunmuş ərazilərdə keçmiş separatçı rejimin bütün simvolları silinməlidir:
"O cümlədən onların "parlament iclasları" üçün istifadə etdiyi binanın sökülməsini düzgün hesab edirəm. Onun yerində daha möhtəşəm yaşayış yaxud digər təyinatlı binalar tikiləcək. Xankəndi digər şəhərlər kimi daha gözəl olacaq. Bu gün Xankəndinin mərkəzində bir neçə kvartal çıxmaq şərtilə, qalan ərazilərdə 1988-ci ildən bəri hər hansı bir tikinti-quruculuq işləri aparılmayıb. Xankəndi Azərbaycanın qədim və görkəmli yerlərindən biridir. İşğaldan azad edilməklə Xankəndinin görkəmi və məzmunuda kökündən dəyişəcək. Parlamentin ölkənin müxtəlif bölgələrində iclasların keçirilməsi ilə bağlı vaxtaşırı təkliflər sürülür. Komitə iclasları keçirilib. Xankəndidə hansısa komitələrin və parlamentin ümumi iclasları keçirilə bilər. Hesab edirəm ki, bunun üçün ən gözəl məkan Xankəndidə açılacaq Qarabağ Universitetinin binasında ola bilər".

Deputat Müşfiq Cəfərov bildirib ki, Qarabağda görülən bütün quruculuq işləri tarixini qoruyaraq həyata keçirilir:
"Məlum olduğu kimi seperatçıların qanunsuz parlament binası kimi istifadə etdiyi tikili sökülür. Ümumiyyətlə, Qarabağda görülən bütün quruculuq işləri tarixini qoruyaraq həyata keçirilir. Xankəndi şəhərində də aparılacaq olan təmir bərpa işləri zamanı da çox güman ki tarixiliyin qorunması priotet olacaqdır. Düşünürəm ki, gələcəkdə Qarabağda bir çox rəsmi qurum və vacib dövlət orqanlarının da köçürülməsi nəzərdədir. Lakin hələ ki, hansı nazirlik olacağı bəlli deyil. Təbii ki, paytaxtın yükünün azalması baxımdan Qarabağ gələcəkdə çox mühüm rol oynayacaqdır. Lakin parlamentin Xankəndiyə köçürülməsi hələ ki real görünmür. Çünki dövlətimizin paytaxtı Bakıdır, parlament binası da orada yerləşir".

Qeyd edək ki, Xankəndidə həmin tikili erməni separatçıları tərəfindən "parlament" binası kimi istifadə edilirdi. Eyni zamanda işğaldan azad olunmuş ərazilərdə Milli Məclisin komitə iclasları keçirilib. Azərbaycan vətəndaşlığını qəbul etmək istəməyən erməni əsilli sakinlər Xankəndi və digər əraziləri tək etdikdən sonra, Azərbaycanın bir sıra qurumları ərazidə öz fəaliyyətlərinə başlayıblar.

Sevda Səfərova

Telegramda izləyin