Məktəb şagirdi QORUMALIDIR! Qız uşaqlarını nişanlamaq cəmiyyətə edilmiş HƏQARƏTDİR - AÇIQLAMA

Xəbər verdiyimiz kimi, Salyan rayon Pambıqkənd tam orta məktəbində şagirdlər arasında erkən nikah halları qeydə alınıb. Məktəbin 11-ci sinif şagirdlərindən biri uşaq dünyaya gətirib. Eyni zamanda, məktəbin yuxarı siniflərində təhsil alan qızlar nişanlı olduqları üçün dərsə gəlməsələr də, jurnalda adlarının qeyd olunduğu və qiymətlərinin yazıldığı iddia edilib. Bu baxımdan məktəbdə bu tip qanunsuzluqların qarşısını almaq üşün hansı addımlar atılmalıdır?

Mövzu ilə bağlı Sonxeber.az-a danışan Sosial Tədqiqatlar Mərkəzinin əməkdaşı, təhsil eksperti Elmin Nuri bildirib ki, bu məsələ Azərbaycan təhsili və cəmiyyəti adına çox problematik və xüsusi nəzarət tələb edən mövzulardan biridir. Zaman-zaman bununla bağlı rəsmi dövlət nümayəndələri, elm və təhsil naziri Emil Əmrullayev münasibətini bildirmişdir. Hətta bununla bağlı ciddi problem olduğunu deyib:
"Bildirmişdi ki, hazırda orta məktəblərdə qız uşaqlarının məktəbdən yayınma halları azalıb. Amma bu yenə də problem olaraq qalmaqdadır. Bunun tam həll olunduğunu demədi. Amma bir məsələyə diqqət çəkək. Qız uşaqlarının məktəbdən yayınma hallarının böyük səbəbi erkən yaşda nikaha girməsi, ailə qurmaqla ilə bağlı ilk addımlarının atılmasıdır. Əksər hallarda bu səbəbdən erkən yaşda məktəbdən yayınırlar. İcbari təhsil əvvəl bizdə 4-cü sinfə qədər idi. Bəzi yerlərdə qız uşaqları 4-cü sinfə qədər oxuyur və valideynləri tərəfindən məktəbə göndərilmirdi. Nə yaxşı ki, bununla bağlı qərar verildi. Artıq məcburi təhsil 9-cu sinfə qədərdir. İndi də bəzi ərazilərdə 9-cu sinfi bitirən kimi qızların təhsil almasına ehtiyac görmürlər. Biz bunu hamıya aid edə bilmərik. Amma fakt olaraq qalır. Bu problemlər hələ də özünü göstərir".

Ekspertin sözlərinə görə, bu gün bizim məktəblərdə, xüsusilə regionlarda qız uşaqlarının məktəbdən yayındırılması və erkən nikaha yönləndirilməsi halları qalmaqdadır:

"Dövlətin qanunvericiliyinin rəsmi nikah yaşı var. Bəziləri bundan kənara çıxmağı hüquqi cəhətdən yol verməsələr də, nişanlanmaq yaxud sözlü etməklə artıq öz məqsədlərini həyata keçirmiş olurlar. Bununla bağlı atılacaq ilk addım cəmiyyətin nəzarəti və maarifləndirilməsidir. Gənc müəllimlər var ki, ucqar yerdə bununla bağlı valideynlər ilə mübarizə aparır. Elə müəllim var ki, bu uğurda öz sağlamlığını riskə atıb. Bu gün bizim təhsil sistemimiz cəmiyyət ilə birləşməlidir. Məktəb uşağa dərs keçməklə bərabər qorumalıdır. Müəllimlərin işə müdaxiləsi maarifləndirici ola bilər. Bu gün deyək ki, qaib sistemi yerinə avtomatik giriş-çıxışların qeydə alınması keçirildi. Sabah bu hallar azalmayacaq. Burada dərin işlər görülməlidir. Daha sərt addımlar atılmalıdır. Bu günləri qız uşaqlarını məktəbdən uzaqlaşdırmaq, onları həyatı tam dərk etməmiş erkən nikaha bağlamaq, nişanlanmaq təkcə qız uşaqlarına deyil, cəmiyyətə edilmiş bir həqarətdir".

Qeyd edək ki, məktəbin şagirdinin erkən nikaha cəlb olunması barədə yayılan xəbərlə bağlı idarəyə sorğu daxil olan kimi dərhal məsələ nəzarətə götürülüb.

Sevda Səfərova

Telegramda izləyin