Qarabağda yeni metro stansiyalar AÇILACAQ? - AÇIQLAMA

Daha əvvəl bildirmişdik ki, Bakı şəhərinin 2040-cı ilədək inkişafına dair Baş Planı təsdiq edilib. Bakı şəhərinin 2040-cı ilədək inkişafına dair Baş planında yeni metro və tramvay xətlərinin çəkilməsi öz əksini tapıb. Gələcək inkişaf planında bu kimi tədbirlər həm tıxac problemini aradan qaldıracaq, həm də vətəndaşlara rahat hərəkət etmə imkanı yaradacaq. Eyni zamanda Bakıda əhali sayı günü-gündən artır. Bu baxımdan keçmiş məcburi köçkünlərin Qarabağa köçürülməsi davam edir. Bərpa-quruculuq işlərinin davam etdiyi bir zamanda, Qarabağda metro stansiyalar açıla bilər?

Mövzu ilə bağlı "Bakı Metropoliteni" QSC-nin mətbuat xidmətinin rəhbəri Bəxtiyar Məmmədov Sonxeber.az-a açıqlama verib:

"Bu "Bakı Metropoliteni"nin səlahiyyətində olan bir səlahiyyət deyil. Çünki bu gün strukturuna daxil olduğumuz sistem yalnız Bakı şəhərinə aid olan bir nəqliyyat vasitəsidir. Qarabağa metrostansiyaların yaradılması "Bakı Metropoliteni"nin rəy verə bilməyəcəyi bir məsələdir".

Nəqliyyat məsələləri üzrə ekspert Elməddin Muradlı Qarabağa yeni metro xətlərinin çəkilməsi ilə bağlı mövzuya münasibət bildirib. Ekspert bildirib ki, Qarabağda bərpa-quruculuq işləri davam edir. Hazırda isə Qarabağa metro xətlərinin çəkilməsi ilə bağlı plan yoxdur.

Xatırladaq ki, Bakının Baş planında 2027-ci ilədək "28 May"-"Cəfər Cabbarlı" keçid stansiyasında yaşıl və qırmızı xətlərinin bir-birindən ayrılması və yeni dəstəkləyici infrastrukturun yaradılması planlaşdırılır. 2040-cı ilədək metro xətləri şəbəkəsinin ümumi uzunluğunun hazırki 36,7 km-dən 76.2 km-ə, stansiyaların sayının isə 25-dən 51-ə çatdırılması nəzərdə tutulur.

Sevda Səfərova

Telegramda izləyin