Prezidentlər Xudafərində nələri MÜZAKİRƏ EDƏCƏK? - AÇIQLAMA

Xəbər verdiyimiz kimi, Novruz bayramına qədər Azərbaycan və İran prezidentləri Xudafərinə səfər edəcəklər. bunu İran İslam Respublikasının Azərbaycandakı səfiri Seyid Abbas Musəvi Baku TV-yə açıqlamasında bildirib. Bəs prezidentlərXudafərində nələri müzakirə edəcək?

Mövzu ilə bağlı Siyasi və Hüquqi Araşdırmalar Mərkəzinin (SHAM) sədri Xəyal Bəşirov Sonxeber.az-a açıqlamasında deyib ki, İran səfiri Azərbaycan və İran prezidentləri Xudafərində görüşəcəklərini deyib. Biz bilirik ki, bir neçə il öncə təməli qoyulmuş Xudafərin və Qız qalası su elektrik stansiyalarının hidroqovşaqlarının tikintisi ilə bağlı razılıq əldə edilmişdi:

" Azərbaycan İran ilə birlikdə həmin stansiyaların tikilməsi proseslərini həyata keçirirdi. Nəzərə alsaq ki, prosesdən sonra Cənubi Qafqazda ciddi dəyişikliklər olub. Azərbaycan İkinci Qarabağ müharibəsini etmək məcburiyyətində qaldı. Azərbaycan Cənubi Qafqazı sülhə yaxın edib. Bu gün artıq post münaqişə dövrünün son dönəmlərini yaşayırıq. Düşünürəm ki, post münaqişə dövründə bəzi məsələlərin həllindən sonra biz münaqişə səhifəsini tam şəkildə bağlamış olacağıq. Cənubi Qafqazda bütün dövlətlər arasında, o cümlədən Azərbaycan Ermənistan arasında münasibətlər normallaşacaq. Eyni zamanda Cənubi Qafqazda sülh və təhlükəsizlik formalaşacaq. Bütün bu məqamları nəzərə alsaq Cənubi Qafqazda bütün iqtisadi kommunikasiyaların bərpası prosesini real olaraq düşünə bilərik. Azərbaycan işğaldan azad edilmiş ərazilərdə bərpa quruculuq işləri həyata keçirir. Beynəlxalq standartlara cavab verən hava limanları, avtomobil və dəmir yolları, tunel və körpülərin inşasını həyata keçirir. Bu Cənubi Qafqazın inkişafına xidmət edən addımlardandır".

Ekspertin sözlərinə görə, Azərbaycan İranla münasibətlərində iqtisadi və nəqliyyat kommunikasiyalarin genişləndirilməsi prosesini həyata keçirməlidir:

"O cümlədən Zəngəzur dəhlizinə alternativ yolun tikintisi ilə bağlı məsələni özündə ehtiva edir. Azərbaycan bir daha ortaya qoydu ki, pozuculuq siyasəti yürüdənləein bütün addımlarına və səylərinə rəğmən alternativ yollar var. Ermənistan yenə də layihələrdən kənarda qalmaq və düşmənçilik siyasətini yürütmək istəyirsə, Azərbaycan ilə münasibətlərin normallaşması istiqamətində üzərinə düşən öhdəlikləri yerinə yetirmirsə, o halda yenidən Azərbaycan üçün alternativlər var. Hətta Zəngəzur dəhlizini özünün qırmızı xətti hesab edən İranla belə biz həmin dəhlizə alternativ yolun çəkilməsinə razılığa gələ bilirik. Biz bir daha beynəlxalq aləmə ve Ermənistan ictimaiyyətinə sübut etmiş olduq. Hesab edirəm ki, bundan ciddi nəticə çıxarmaq lazımdır. Artıq Azərbaycanın Zəngəzur dəhlizinə alternativ yolun Ağbənddən keçən körpüdən reallaşmasından sonra bu prosesə paralel olaraq Xudafərin və Qız qalası su hidro qovşaqlarının istifadə veriləcəyi prosesini həyata keçirsə, bir daha ondan xəbər verəcək ki, region üçün böyük iqtisadi potensial yaranır. Daha doğrusu logistika potensialı yaranır və bundan bütün dövlətlər istifadə edəcək. Bu prosesdə pozuculuq siyasəti yeridənlər layihədən kənarda qalacaqlar. O cümlədən Ermənistan və dəstək göstərən Fransa prosesə əngəl törədirsə, layihədən kənarda qalmalıdırlar".

Xatırladaq ki, Azərbaycan Respublikasının Prezidenti İlham Əliyev 2016-cı ilin iyul ayında "Azərbaycan Respublikası Hökuməti ilə İran İslam Respublikası Hökuməti arasında Araz çayı üzərində "Xudafərin" və "Qız Qalası" hidroqovşaqlarının və su elektrik stansiyalarının tikintisinin davam etdirilməsi, istismarı, energetika və su ehtiyatlarından istifadə sahəsində əməkdaşlıq haqqında" Sazişi təsdiq edib. Sazişə əsasən Cəbrayıl rayonu ərazisində Araz çayı üzərində "Xudafərin" və "Qız Qalası" hidroqovşaqlarının və su elektrik stansiyalarının tikintisi və istismarı üzrə işlər davam etdirilir.

Telegramda izləyin