"15-20 ildi deputat kürsüsündə oturanlar da "daha bəsdi" deməyi bacarmalıdırlar..."

"Onlardan artıq "naftalin iyi" gəlir, özləri hiss etməsəlır də, kənardan aydın duyulur..."

"Növbəti parlament seçkilərinin ölkədə ciddi ictimai-siyasi hadisə olacağına, siyasi sistemin inkişafına əlavə təkan verəcəyinə inanırıq. Son prezident seçkiləri kimi bu da, ərazi bütövlüyümüzün bərpa olunduğu şəraitdə ilk parlament seçkiləri olacaq".

Bunu Moderator.az-a açıqlamasında "Necə hesab edirsiz, Milli Məclisə payzıda gözlənilən növbəti seçkilər ölkəmizin daxili ictimai-siyasi həyatında hansısa ciddi dəyişikliklərə səbəb olacaqmı?" sualını cavablandırarkən Azad Vətən partiyasının sədri Akif Nağı söyləyib.

"Qarabağ Azadlıq Təşkilatı olaraq 30 il ərzində milli maraqlar, dövlət maraqlarının yanında olduq. Bu seçkilərdə də məhz dövlət maraqlarına xidmət mövqeyindən çıxış edəcəyik. İnanırıq ki, parlamentin tərkibi ciddi şəkildə yenilənəcək. Dövlət rəhbərliyinin bu yeniləşmənin tərəfində olacağına ümid edirik. 15-20 ildi deputat kürsüsündə oturanlar da "daha bəsdi" deməyi bacarmalıdırlar. Onlardan artıq "naftalin iyi" gəlir, özləri hiss etməsəlır də, kənardan aydın duyulur", -deyə davamında siyasətçi diqqətə çatdırıb.

"Partiyanız və şəxsən özünüz payızda keçirilməsi gözlənilən parlament seçkilərinə necə hazırlaşırsız?" sualına isə partiya rəhbəri belə cavab verib:

"Partiyamız bütün istiqamətlərdə seçkilərə hazırlaşır. Zatən, partiyanın fəaliyyətinin əsas hissəsi seçkilərlə bağlıdır. Biz də bu formulu fəaliyyətimizdə rəhbər tuturuq. Konkret olaraq müxtəlif dairələrdə şanslarımızı nəzərdə keçirir, qalib gələ biləcəyimiz dairələri təxmini olsa da müəyyənləşdirir, namizədlərimizin siyahısını dəqiqləşdirir, əsas şüarlarımızı seçir və digər işləri həyata keçiririk. Prezident seçkiləri zamanı Seçki qərargahı yaratmışdıq. Hazırda həmin qərargahın tərkibini yeniləyir, genişləndiririk".

Telegramda izləyin