Barselonaya da sel gəldi - Video

İspaniyada baş verən daşqınlardan Barselona şəhəri də zərər görüb.

"Qafqazinfo" "Associated Press"ə istinadən xəbər verir ki, daşqınlara görə səlahiyyətlilər şəhərətrafı dəmir yolu xidmətini dayandırmağa məcbur olub.

İspaniyanın nəqliyyat naziri Oskar Puente 8 milyon əhalisi olan Kataloniyanın şimal-şərqində bütün şəhərətrafı qatarların hərəkətinin dayandırıldığını bildirib.

Daşqın səbəbindən şəhərdə bir neçə magistral yol bağlanıb.

Barselona-El Prat Hava Limanında 70-ə yaxın uçuş təxirə salınıb, 18 uçuş isə başqa istiqamətlərə yönəldilib. Leysan yağışları hava limanının T-1 terminalı və dayanacaq yerlərində də daşqınlara səbəb olub.

İspaniyanın milli meteorologiya agentliyi Barselona üçün qırmızı xəbərdarlıq elan edib.

Həmçinin Kataloniyanın cənubunda, Barselona ilə Valensiya arasında təxminən yarı yolda yerləşən Tarraqona şəhərində yağışlar barədə qırmızı xəbərdarlıq elan edildikdən sonra dərslər ləğv edilib.

Xatırladaq ki, İspaniyada daşqınlar nəticəsində həlak olanların sayı 217-yə çatıb.

Telegramda izləyin